COSSÍ FAR D’ELECTRICITAT AMB DE CALOR
Una còla scientifica descobriguèt cossí produire d’electricitat amb sonque la calor coma font d’energia. La descobèrta es plan importanta al nivèl mondial pr’amor que poiriá ajudar a la generacion d’energia fòrça mai ecologica per de veituras, de viatges espacials o encara per de procèsses industrials.
La trobalha es estada publicada dins la revista numerica Science Advances, e es basada sus de particulas sonadas paramagnons, de particulas que son gaireben, mas pas totalament, d’aimants e que pòdon menar de flux magnetic. Es una descobèrta frapanta pr’amor que fins ara aquò se coneissiá pas scientificament. Per ansin, los aimants, quand son cauds, pèrdon lor fòrça e venon paramagnetics. E un flux de magnetisme pòt crear de termoelectricitat de magnons, que pòt plan convenir per calfar la temperatura d’una pèça.
“Sens cap de dobte es una descobèrta interessanta, çò diguèt l’engenhaire Joseph Heremans, professor d’engenhariá aerospaciala de l’Universitat d’Ohio. Es una trobalha que degun fins ara pensava pas possibla. Fins ara, los scientifics cresián que s’un paraaimant èra caufat, se passava pas res, e nosautres avèm pogut demostrar qu’aquò es pas aital”.
Lo paradòxe scientific arriba quand los aimants son mai cauds, pr’amor que pèrdon lors proprietats magneticas. Alara venon de particulas que son gaireben d’aimants mas qu’o son pas. E aquò vòl dire que fins a uèi lo jorn degun pensava pas utilizar de paraaimants per produire d’energia.
Un temps tras que reduch
La còla scientifica que descobriguèt cossí produire d’electricitat amb de calor poguèt provocar que los paraaimants butèsson los electrons solament pendent un miliard de milions de segonda, çò es lo temps necessari per entraïnar que los paramagnets poguèsson emmagazinar d’energia.
La còla que poguèt far aquò recebèt totjorn lo supòrt de l’estat d’Ohio, de l’Universitat de Carolina del Nòrd, del Departament d’Energia dels Estats Units e de l’Acadèmia de las Sciéncias de China: se pòt doncas dire que malgrat que las pròvas scientificas foguèsson realizadas dins de laboratòris estatsunidencs, l’esforç foguèt internacional.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
