DE DIOXID DE CARBÒNI TRANSFORMAT EN LIQUID
Una còla internacionala poguèt, fin finala, transformar dioxid de carbòni en liquid en tot utilizar d’electricitat. L’invencion, segon los pròpris cercaires, serà clau pendent lo futur mai pròche a l’ora de reciclar dioxid de carbòni e netejar l’atmosfèra, çò que poiriá èsser una solucion scientifica per la pollucion environamentala actuala.
La conversion del dioxid de carbòni poguèt èsser facha amb la creacion d’un reactor catalitic desvolopat per l’Universitat de Rice (Tèxas) e lo trabalh d’una còla qu’a coma cap lo quimic Haotian Wang. Amb aquel reactor lo dioxid de carbòni es usat coma carburant per produsir d’acid formic.
Lo metòde utilizat, publicat al numeric Nature Energy, foguèt possible mercés a un nòu tipe de catalizador electric que pòt arribar convertir fins lo 42% del dioxid de carbòni usat. “Çò es la mitat de l’energia electrica utilizada per formar d’acid formic, çò diguèt Wang. E l’acid formic pòt crear d’electricitat e mai dioxid de carbòni, que pòt tornar èsser reciclat tornarmai”.
Un nòu tipe de reactor
Lo reactor, qu’utilizèt un nòu catalizador mai eficient aital coma una nòva manièra d’eliminar la necessitat d’usatge de sal per aquela reaccion quimia, poiriá èsser un bon espèr pel problèma environamental de la pollucion.
“Cal redusir lo dioxid de carbòni se volèm luchar plan contra lo cambiament environamental, çò apondèt Wang. Se podèm far d’electricitat amb de sorças coma lo Solelh o lo vent perqué pas usar lo quite dioxid de carbòni per lo redusir ?”.
Totun, que cal ara poder tornar far aquela conversion a nivèl industrial e pas solament dins una laboratòri. Se aquò se pòt arribar far, çò confirmèron los scientifics, seriam dintrats dins una nòva edat, ont la lucha contra lo cambiament climatic e l’escaufament de l’atmosfèra actual seriá ja seriosa e eficaça.
La Redaccion
