CATALONHA LANÇARÀ UN NANOSATELLIT A L’ESPACI
Lo govèrn de Catalonha confirmèt la setmana passada qu’abans la fin de març Catalonha lançarà lo sieu primièr nanosatellit a l’espaci. Lo projècte foguèt desenvolupat per l’entrepresa catalana Sateliot e lo lançament se debanarà dempuèi la basa espaciala de Baikonur, en Cazacstan. A mai, lo govèrn catalan signèt amb Sateliot e l’entrepresa Opencosmos lo lançament d’un segond nanosatellit abans la fin d’ongan.
Aquel serà lo primièr de tres pichonèls satellits que lo govèrn catalan vòl situar en l’espaci mai pròche de la planeta per melhorar los servicis d’Internet en aquel país. Per aquò la tòca del lançament del primièr nanosatellit, que recebrà lo nom segon una votacion populara dels mainatges catalans de tot lo país, seriá una melhor comunicacion al territòri qu’uèi lo jorn a de problèmas a l’ora de recebre lo senhal d’internet, coma los parçans que i a al Pirenèu.
Segon lo conselhièr delegat de l’entrepresa Sateliot, Jaume Sanpere, cal rebrembar que “uèi Catalonha sonque recep lo senhal d’internet en sonque un 10% de la siá superficia e donar una melhor recepcion d’internet a travèrs d’aquel nanosatellit serà una vertadièra revolucion comunicativa pel país”.
Lo lançament d’aquel pichon a un prètz de 574 000 euros, un fach que foguèt pasmens plan criticat per totes los partits politics de l’oposicion. E coma qu’es lo govèrn que paguèt aquela chifra, las donadas que recebrà lo govèrn del satellit seràn sonque utilizadas pel quite govèrn catalan e pas per de personas particularas nimai d’entrepresas. Sonque, mai tard, çò confirmèron fònts governamentalas catalanas, aquelas donadas arribaràn a las universitats e los centres de recerca scientifica e tecnologica.
Un segond pichon satellit abans de 2022
La Generalitat de Catalonha tanben confirmèt que lo projecte signat amb Open Cosmos (e que s’inclutz dins la creacion en octubre passat de l’Agència Espaciala Catalana) tanben preven lo lançament d’un segond nanosatellit abans de la fin de 2021. Aquel a un pressupost d’1,7 milions d’euros e la siá tòca serà espepissar la superfícia de la Tèrra e balhar d’informacion sus lo cambiament climatic per assajar d’arrestar futuras catastròfas environamentalas.
De soslinhar qu’ambedós satellits (en tot esperar la confirmacion de la data del lançament del tresen nanosatellit catalan) seràn contrarotlats per l’Observatòri Astronomic del Montsec , de l’Institut d’Estudis Espacials de Catalonha. Aquela seriá la basa centrala catalana a l’ora de recebre de donadas espacialas. Totes tres satellits serián dins l’estratègia del govèrn catalan nomentada Ner Space, qu’a un pressupost total de 18 milions d’euros fins a 2024 e que vòl situar Catalonha entre los primièrs païses europèus qu’usa aquela tecnologia per melhorar las comunicacions de lors abitants.
La Redaccion
