Lo lac canadenc Crawford es estat causit coma lo primièr luòc ont foguèron trobats de senhals de la naissença de la nòva edat antropocèna. Lo luòc es estat triat per una còla internacionala de cercaires pr’amor que representa melhor lo començament d’una nòva èra geologica de la planeta, l’Antropocèn.
Ansin, lo Grop de Trabalh de l’Antropocèna causit lo lac Crawford coma senhal segur de la naissença de l’Antropocèn. Segon los cercaires, ara sèm a l’Antropocèn, una nòva edat geologica ont l’activitat umana contraròtla al 100% los clima e environament de la planeta.
Totun, pas tota la comunautat dels geològs es d’acòrdi sus la data de naissença de l’Antropocèn. “Los depauses trapats dins lo lac Crawford confirman que i a agut un cambiament environamental sus la planeta pendent los mila darrièrs ans, çò diguèt Simon Turner, geològ. De cambiaments en la quimia de l’aiga e l’ecologia an creat de senhals divèrses sus l’activitat umana. E aquò es estat demostrat”.
De senhals per tota la planeta
Los cercaires amassèron de corals e tanben de glaç de pertot. Los exemples foguèron estudiats per l’Universitat de Southampton. I caliá trobar la preséncia de plutòni. Lo cercaire Andrew Cundy a confirmat qu’aquela preséncia es un senhal clar del moment que l’espécia umana venguèt la contrarotlaira de la planeta.
“Dempuèi los ans 1950 e après las primièras bombas atomicas, la preséncia de plutòni quita pas de créisser. Dempuèi los ans 1960, es mens present, dempuèi lo Tractat d’Enebicion de las d’Armas Nuclearas”, çò confirmèron los cercaires.
D’autres senhals que confirman la naissença de l’Anropocèn son la preséncia de cendre dins l’aire a mai de grandas quantitats de plastic. Aquò s’es tengut pendent la Granda Acceleracion, que soslinha una màger preséncia umana sus la planeta e que contunha uèi. Los cercaires an doncas prepausat lo lac Crawford coma epicentre de la nòva èra geologica.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
