Home TECNOLOGIA MART 2022, VIATGES AU PRÈTZ D’UA IPOTÈCA
MART 2022, VIATGES AU PRÈTZ D’UA IPOTÈCA
0

MART 2022, VIATGES AU PRÈTZ D’UA IPOTÈCA

0
0

Qu’ac anonciè Elon Musk, conselhèr delegat de l’enterpresa SpaceX: en 2022 qu’i averàn viatges tà colonizar Mart peu prètz d’ua ipotèca. E lo tornar tà la Tèrra e serà a gratis. Atau los plans deu cofondator de Paypal tau futur mei près. Lo començar de la construccion d’ua navèra civilizacion suu planeta roi qu’ei au punt de començar.

nasa-mars
Totun, lo risc de morir pendent los purmèrs ans èra hèra hau.

Atau, los umans que poderén viatjar tà Mart de cap a 2022 en ua nau espaciau que poderà miar enter 100 e 200 personas cada 26 mes. Segon aqueth plan d’Elon Musk, lo viatge que costarà enter 88.900 € e 177.800 € segon l’equipatge deu viatjaire. Tanben segon Musk, aqueth viatjaire n’i poderà pas anar shens quauques dias d’entrainament. A despieit d’aquò, lo conselhèr de SpaceX que confessè que lo prètz de miar ua persona tà Mart que seré en realitat de 8.900 milions de dòlars mes la soa enterpresa que’n vòu arredusir lo prètz a lo d’un ostau mejan deus Estats Units.

Bastir ua navèra civilizacion

Aqueths plans qu’estón anonciats la setmana darrèra. Lo prètzhèit qu’ei de començar la construccion d’ua navèra civilizacion umana suu planeta roi e qu’estón presentats pendent lo 67au Congrès Internacionau d’Astronautica, qui’s debanè augan au Mexic.

Musk, qu’èra un deus intervienents mei esperats, que confirmè atau que lo saunei de conquistar Mart qu’ei dejà possible dab “ua comunautat auto-suficienta” d’un milions de personas. Aquò seré un prètzhèit qui poderé préner enter 40 e 100 ans e qui seré ua realitat dab ua flòta de 1000 naus interplanetàrias.

mars-human-explorers
En 2022 qu’i averàn viatges tà colonizar Mars peu prètz d’ua ipotèca.

Lo cofondator de Paypal que presentè ua video on se podèva véder quin seré aqueth viatge. La nau de transpòrt qu’averé fusadas qui poderén estar utilizadas mantun còp – que tornarén tà la Tèrra tres còps-. Lo viatge duraré enter 80 e 150 dias tà las purmèras missions mes tanlèu lo 30au còp lo projècte que seré dejà solide. De mei, la nau qu’averé panèus solars entà aver mei d’energia. En mei d’aquò, Musk que soslinhè que Mart e poderé aver cinèmas, restaurants e pizzerias tanben. Lo viatge que seré amusant mes los viatjaires qu’averàn d’aver un esperit aventurèr e hèra de volontat.

A despieit de tot aquò, Musk que confessè que lo risc de morir pendent los purmèrs ans èra hèra haut e qu’adara e caleré fondar ua aliança publica e privada mondiau entà arribar ad ua prètzhèit tant ambiciosa. Aqueths plans ne poderén pas estar sonque hum e pro, o lhèu non. Lo futur qu’ac diserà.

La Redaccion

LEAVE YOUR COMMENT

L'adreça electrònica no es publicarà. Els camps necessaris estan marcats amb *