TRAPEN ETH PRUMÈR DINOSAURE
Ère malaisit ena recèrca deth prumèr dinosaure trapar quauque ancessor qu’es scientifics podessen díder qu’ère eth que demorec abans de toti es autes. Eth qu’auie sigut eth prumèr de toti. E coma passa en arqueologia, era paleontologia o sciéncia qu’estudie es dinosaures e d’autes animaus deth passat mès luenhan, a demorat era arribada d’aguest jorn damb illusion.
Fin finau, era còla de scientifics des universitats de Manchester e Portsmouth (Anglatèrra) amassa damb eth Museu Nacionau de Galas an publicat ena revista scientifica PLos ONE eth que poirie èster eth prumèr dinosaure de toti: Dracoraptor hanigani.
Era descoberta, totun, non l’an hèt eri mès dus hrairs, Nick e Rob Hanigan – pr’aquerò eth sòn nom – en ua plaja prèp de Cardiff, País de Galas-. Es scientifics que l’an estudiat an volut pr’açò aunurar es dus joens que l’an trapat mès tanben er animau nacionau de Galas – eth drac – dempús d’auer hèt dilhèu era descoberta paleontologica mès grana de tot er an.
Atau, Dracoraptor hanigani demorèc just pendent er inici dera edat jurassica, moment en quau comencèren a auer dinosaures ena Tèrra, hè 201 milions d’ans. Ei un individú fòrça petit pr’amor que hè 70 cm de nautada e coma qu’a ua coa força longa, 2 metres de longada.
Es origines des dinosaures
Damb Dracoraptor hanigani es paleontològs ant trapat adara un shinhau mès de lutz sus aguesta epòca. E era sua descobèrta confirma que, pendent era edat anterior, eth Triassic, i auec tanben ua auta grana extincion que possibilitèc era neissença de naus animaus coma es dinosaures pendent eth Jurassic.
“Ère un animau fòrça agil e carnivòr –çò ditz Steven Vidovic, dera Universitat de Portsmouth-. E tanben familha luenhana de Tyranosaurus rex. Ei probablaments eth dinosaure mès ancian jamès trapat ena planeta e pr’açò se pòt díder qu’ei eth prumèr dinosaure de toti”.
Eth progrés dera sciéncia non a donques arturador. Era paleontologia aurie trapat segontes açò eth prumèr dinosaure, er ancessor mès ancian. Demoram qu’es arqueològs poguessen lèu tanben descurbir eth malhon perdut o quin siguec eth prumèr ominid pr’amor que ja hè mès de 50 ans que’l cerquen e que’l trapen pas.
Christian Andreu
