Una còla de paleoantropològs a trobat una dent denisovana dins una cauna de Laos, al sud-èst asiatic. La trobalha es plan importanta pr’amor que, en defòra de las montanhas d’Altai, en Siberia, ont foguèron trobats los primièrs òsses fòssils en 2010, sonque ne trapèron mai en Tibet. Ara, aquesta descobèrta confirmariá que los denisovans visquèron plan per tot lo continent asiatic.
La dent trobada es una molara d’una denisovana plan jove que visquèt de fa 164 000 a 131 000 ans dins la cauna de Tam Ngu Hao 2, en Laos. La molara es fòrça semblabla a la descobèrta a Xiahe, en China, e confirma qu’apertenguèt a una persona de l’espècia denisovana, una de las pus misteriosas de la familha ominida uèi per uèi.
Una denisovana dins un clima tropical
La dent foguèt trapada en decembre de 2018 mas fins ara poguèt pas èsser confirmat geneticament qu’èra d’un denisovan. La descobèrta foguèt casuala pr’amor que los scientifics estudiavan la region montanhosa de Huà Pan, en Laos, per assajar de trobar de fossils de nòstra espècia car es estat demostrat qu’i visquèt fa 70 000 ans.
“Dins la cauna de Tam Ngu Hao 2, i aviá de dents d’ervibòrs gigants coma d’ancians elefants e tanben de rinocèros que demoravan a aquela epòca dins l’airal, una region plena de bòsques, çò diguèt Fabrice Demeter, paleoantropològ de la Fondacion Geogenetics de Lundbeck, qu’aperten a l’Universitat de Copenaga. L’estudi de la dent, pasmens, foguèt fach pel trabalh collectiu de l’Institut Global, lo Musèu Nacional d’Istòria Naturala de França e l’Universitat de Copenaga.
“Es una descobèrta fòrça importanta pr’amor qu’avèm cercat de fossils denisovans pertot e ara ne trapam en Laos, çò apondèt Demeter. Es la confirmacion de la preséncia de denisovans en Asia del Sud-Èst. E confirma tanben lo trabalh genetic fach fins ara; los denisovans visquèron per tot l’airal de Siberia fins en Laos a aquela epòca”.
En mai d’aquò, cal confirmar tanben la semblança entre aquela dent ara trobada en Laos e las registradas en 2020. Segon los cercaires, la dent es d’una dròlla d’entre 3,5 e 8,5 ans que visquèt dins la region tropicala de Laos fa entre 164 000 e 131 000 ans. Un estudi proteïnic confirmèt l’edat de la dròlla.
“Aquò confirma qu’en aquela region i visquèron amassa almens fins a sièis espècias omininas desparièras: Homo erectus, Homo sapiens denisovae, Homo sapiens neandertaliensis, Homo floresiensis, Homo luzonensis e Homo sapiens sapiens, nòstra espècia”, çò afirmèt Demeter. L’estudi d’aquela dent denisovana foguèt publicat dins lo numeric Nature Communications.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
