Disèm totjorn que çò que fa la sciéncia uèi lo jorn pòt arribar èsser susprenent. Mas, de còps, es atanben moral ? Una nòva experimentacion en de pòrcs poguèt far tornar a la vida de cellulas cerebralas d’un animal mòrt. Cal pas s’inquietar pr’amor que son d’experimentacions scientificas qu’an coma tòca poder luchar melhor contra de malautiás cerebralas e i aguèt pas cap d’animal que patiguèsse cap dan. Totun, es una experimentacion tras qu’estonanta e a la limita de çò qu’es o es pas moral.
Aital, e mai de dètz oras apuèi la sieuna mòrt (que las cellulas serián totalament deterioradas) de cervèls de pòrcs mòrts foguèron banhats dins un liquid nòu nomentat BrainEx qu’entraïnèt la tornada a la vida de totas las cellulas cerebralas de l’animal mòrt.
Segon aquela experimentacion, que los cercaires afirmèron qu’èra estada un bèl succès, èra estada restaurada l’activitat cerebrala dels pòrcs mòrts divèrsas oras apuèi la mòrt dels animals. Èra una experimentacion jamai realizada abans e pr’aquò totalament nòva. Una espròva scientifica que trincariá amb l’idèa de l’irreversibilitat de la pèrta d’activitat cerebrala mai enlà de la mòrt.
La resulta de l’experimentacion foguèt publicada a un dels numerics mai serioses e prestigioses de sciéncia de la planeta, Nature. E poiriá ajudar plan en la lucha contra de malautiás cerebralas. Aital, ara dison los cercaires que faguèron aquel estudi (l’Universitat de Yale), es una giganta passa per guarir de malautiás cerebralas qu’an pogut atanplan patir fauta d’oxigèn. Totun, que la discussion tanben torna èsser obèrta pr’amor que la moralitat sus far tornar a la vida de cervèls mòrts es dobtosa.
De cervèls sens cap d’activitat cerebrala
Per far aquela experimentacion los cercaires soslinhèron qu’avián pas tuat cap animal viu per o far. Èran de pòrcs qu’èran estat mòrts abans pr’amor que la sieuna fin èra l’alimentacion umana. E maugrat que los scientifics poguèren tornar activar l’activitat neuronala del cervèl de plusors animals mòrts poguèren pas espepissar cap tornada a la consciéncia d’aqueles animals. Segon una de las autoras d’aquel estudi, Nita Farahany “es ara estada descobèrta una zòna grisa entre los animals vius e los mòrts qu’abans èra pas coneguda”.
Los pòrcs que foguèron mòrts e destinats a alimentacion umana foguèron decapitats, e 300 d’aqueles foguèron enviats dins de glaç a un laboratòri situat a l’Universitat de Yale. Foguèt ailà que los cercaires comencèron l’experimentacion. Apuèi mai de 5 oras de la mòrt dels animals los scientifics poguèren tornar l’activitat cerebrala de 32 d’aqueles animals. Aquò arribèt après los banhar en BrainEx dins una cambra que fasiá córrer la sang, balhava d’oxigèn e de sucre e trasiá lo CO2.
Los cervèls d’aqueles pòrcs mostrèron tornarmai d’activitat cerebrala pendent 6 oras. L’oxigèn entrava als cervèls e lo CO2 ne sortissiá e d’analisis fachas confirmèron que los cervèls èran actius metabolicament. Divèrsas parts de l’ipocamp e lo cortex prefrontal (d’airals qu’ajudan pensar) foguèron estudiadas e trobada d’activitat en divèrsas cellulas neuronalas. Per contra, totes aqueles cervèls que foguèron pas banhats dins lo liquid nomentat BrainEx patiguèron un lèu dan, un fach normal un còp l’animal es mòrt. Cossí siá, foguèt una experimentacion excepcionala que pòt entraïnar demandar se i pòt aver de vida biologica après la mòrt.
La Redaccion
