Uèi lo jorn i a la credença scientifica mas tanben populara que l’èsser uman a de manèra universala entrò sièis emocions basicas: felicitat, tristesa, paur, ràbia, estonament e pena. Mas aquesta vertat scientifica benlèu non es aital pr’amor qu’ara scientifics de Glasgow, en Escòcia, dison que, d’emocions basicas, solament n’i a quatre.
Pr’aquò e segon un estudi scientific fach sus las reaccions de las caras dels umans, una còla de la Universitat escocesa de Glasgow a confirmat que las emocions basicas de felicitat e tristesa son fòrça claras mas que las emocions de paur e estonament solament an coma reaccion basica faciala la dobertura dels uelhs.
De mai, autras doas emocions laissadas coma basicas, çò es ràbia e pena, tanben an amassa una reaccion facial bàsica qu’es fa visible amb lo rufament del nas. Pr’aquò n’i aurián solament quatre, d’emocions basicas umanas. Las autras serián posteriors e non basicas.
Expressions facialas qu’o dison tot
“Dubrir los uelhs balha avantatges per fugir a l’èsser uman. Aquò ven per l’emocion basica de la paur e l’estonament – çò diguèt Rachel Jack, qu’a publicat l’estudi en la revista Current Biology-. Aital se debana qu’amb rufar lo nas non se permet que i aja inspiracion en l’alendament. De mai, dubrir los uelhs permet veire melhor e trobar abans un lòc ont fugir. Tot aquò son emocions umanas basicas”.
Al delà d’aquò, aquesta còla auriá trobat que’ls umans solament an aquestas quatre emocions basicas e que se n’i a de mai son subordinadas jerarquicament segon la biologia de l’èsser uman.
Ara, aquesta meteissa còla vòl estudiar las desparièras expressions facialas segon las divèrsas culturas umanas. Tanben vòlon estudiar las populacions de l’Èst asiàtic pr’amor que son conegudas per far mai enfasi amb los uelhs que non pas movements amb la boca, coma fan tradicionalament los occidentals.
Christian Andreu
