Mentre era planeta se prepare entara corsa espaciau entara Lua e enquia es nacions mès petites tanben ac hèn (Israel), nòves donades scientifiques questionen era possibilitat de hèr ben viatges longui per espaci pr’amor qu’i aurien problèmes grèus entara santat mentau des astronautes.
Son donades que poirien èster definitiues maugrat qu’er estudi contunhe, mès tot semble confirmar que hèr viatges longui en espaci pòt arribar crear problèmes mentaus e psicologics grèus entas astronautes. Atau ac demòstre un nau estudi hèt per scientifics dera Universitat Northwestern, en Estats Units.
Er estudi serà seguraments polemic pr’amor que diuèrsi scientifics qu’estudien era santat des astronautes contunhen considerant qu’es problèmes mès grèus que pòt arribar a patir un astronauta en espaci son fisics e non psicologics (e era majoritat d’aqueri desapareishen dempús bèri uns dies o mesi). Açò ei pr’amor que fòrça estudis d’aguesti tipe son hèts sus era santat der astronauta Scott Kelly, que demorèc mès d’ua annada ena Estacion Espaciau Internacionau.
Pr’açò diuèrsi scientifics d’aquera universitat estatunidenca an volut soslinhar qu’es problèmes psicologics que poden patir es astronautes en missions longues en espaci poden èster fòrça pejors. Es causes serien er isolament totau, dromir mau, pauca comunicacion damb era familha e amics ena Tèrra e eth contacte massa long damb auti astronautes laguens un espaci pro redusit.
Un estudi hèt damb 8 astronautes
“Era majoritat d’esfòrci hèti entà crear un modèl sus era santat des astronautes dempús de longui viatges en espaci sigueren criticadi – çò diguec Noshir Contractor, dera Universitat Northwestern -. E era comunautat scientifica afirmèc qu’es estudis non èren bons pr’amor qu’es donades non èren bones”.
Es scientifics qu’an realizat aguest nau estudi sus era santat des astronautes voleren conéisher com serien aguest tipe de viatges a Mart, que poden arribar a demorar enquia tres annades. Pr’açò estudièren era capacitat creatiua entà resòlver problèmes de 8 astronautes dempús dera sua tornada ena Tèrra. Era resulta siguec qu’era majoritat des astronautes non podie resòlver ben aqueri problèmes.
Atau, eth nivèu de succès des astronautes entà resòlver diuèrses problematiques practiques solament arribèc ath 20%-60%. E açò siguec considerat pes scientifics com un nivèu fòrça aluenhat deth d’auti umans que non an gessut encara ar espaci. Damb aqueres naues donades es cercaires vòlen ara questionar eth criticisme dera comunautat scientifica e alertar sus es possibles problèmes psicologics grèus que poden patir es astronautes pendent viatges longui en espaci.
Totun, aqueth estudi contunhe e ara es scientifics vòlen trapar un modèl ideau entara NASA qu’ajudarà hèr bones equipes d’astronautes damb ua melhor capacitat entà resòlver es problèmes que i poden auer en espaci. Un estudi que dilhèu serà fòrça polemic.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
