Home ISTÒRIA PORTAVAN DE CÈRVIS PER MAR
PORTAVAN  DE CÈRVIS PER MAR
0

PORTAVAN DE CÈRVIS PER MAR

0

Estonament general de la comunautat arqueologica escocesa. Un nou estudi fach per David Stanton, de l’Universitat de Cardiff (País de Galas), entre d’autres, confirma geneticament que los cèrvis trobats a las illas mai luenhanas d’Escòcia i arribèron pas de manièra naturala. Solament i a doncas una solucion a aqueste dilèma: foguèt l’òme.

FullSizeRender
Lo Cèrvi de Morre Roi foguèt portat a las illas plaçadas mai al nòrd d’Escòcia per l’òme.

Aital, la còla scientifica qu’a fach l’estudi genetic de la populacion de cèrvis que i a dins aquestas illas al nòrd d’Escòcia a pogut confirmar que la sieuna origina es fòrça luenhana e que solament poguèron arribar aici menats per l’òme preïstoric.

L’espècia de cèrvi que demora en aquestes luòcs es lo Cèrvi de Morre Roi, un cèrvi qu’es pas familha d’autres cèrvis que demoran a Escòcia, Irlanda o Euròpa continentala. Un còp es estat conegut que cap d’aquestes païses ne Norvègia son la sieuna origina, l’ipotèsi d’un òme preïstoric que l’a portat a aquestas illas ven de mai en mai pus plausible.

“Pensem que l’òme que demorèt pendent l’Edat Neolitica foguèt capaç de transportar e portar aqueste tipe de cèrvi a travèrs de distancias fòrça considerablas fa entre 4.500 e 5.500 ans – çò diguèt David Stanton -. Quan o avèm descobèrt es estat estonant pr’amor qu’encara non avèm comprés quina es la nòstra relacion amb aquesta espècia”.

Pr’aquò ara pensan que benlèu l’òme preïstoric aguèt una autra solucion amb lo cèrvi. Benlèu que n’aviá gròps sancers en barralhas e amb eles podiá minjar mas tanben far de longs viatges. Que es estat sabut que ja o fasiá amb de pòrcs, vacas e fedas mas encara se coneissiá pas qu’o faguèsse amb d’animals salvatges.

Una relacion plan prigonda

Lo Cèrvi Roi es un animal qu’arribèt fins a las illas britanicas pendent la fin de la darrièra edat de gèl, çò es fa 11.000 annadas. Foguèt un animal fòrça important per l’òme preïstoric que demorava al luòc abans e après l’arribada dels primièrs grangièrs del Neolitic.

ben-halton_stags_600
L’origina del Cèrvi Roi que demora en tèrras escocesas encara a d’èsser determinat.

Amb eles avián de pèls, d’òsses e de ligaments dont podián far de vestits. Èra una peça clau dins l’economia locala. Benlèu pr’aquò l’òme preïstoric lo portava amb el ailà ont anava, çò dison los arqueològs de la còla qu’a fach aqueste estudi.

Après lo maximum glacial de la darrièra edat del glaç, aquestas illas del nòrd d’Escòcia son estadas desseparadas d’Escòcia pendent fòrça temps per la mar. La distancia es pro longa, çò dison los scientifics, e cap cèrvi pòt far aquesta travessa en tot nadar.

De segur que l’òme preïstoric lo portèt a aquesta illas per aver de carn segura mas ara la còla qu’a fach l’estudi vòl assajar de determinar quina es l’origina reala d’aqueste cèrvi pr’amor qu’es pas Escòcia, Irlanda o Norvègia. Mas un pauc mai luenh…

Christian Andreu