La discussion populara sus se cèrtas bevendas van plan per la santat o pas pòt arribar d’èsser etèrna. Cada an i an de nòus estudis que dison o mai lèu confirman que de bevendas coma lo cafè son o son pas bonas per la santat. Ara un nòu estudi, fach en 2018, afirma scientificament que beure fins a quatre tassas de cafè cada jorn melhorarà la santat del nòstre còr.
Segon aquò, las nòvas resultas an de conclusions fòrça originalas; après divèrsas pròvas fachas en de mirgas, se pòt afirmar scientificament que beure de cafè ajuda disminuire lo risc d’aver una ataca de còr. L’explicacion seriá pro simple mas pas encara descobèrta per degun: la cafeïna seriá çò qu’ajuda las cellulas en tot donar mai d’energia per luchar contra un dan pendent una ataca de còr.
L’estudi, fach pendent 10 jorns amb de mirgas, foguèt fach en tot donar aquelas bèstias fins a 4 tassas de cafè cada jorn. Aprés foguèt provocada una ataca de còr. Solament las mirgas qu’avián begut de cafè aguèron una lèu recuperacion en lor santat. Las autras mirgas demorèron fòrça mai temps per tornar aver una bona santat. Vòl dire aquò que lo cafè fa mai fòrt lo nòstre còr ?
La cafeïna provòca la transformacion de proteïnas
Un estudi prigond realizat per la còla de cercaires que fasiá las pròvas amb las mirgas poguèt demostrar que la cafeïna ajuda transformar cèrtas proteïnas nomentadas P27 en de mitocondrias, los organismes que produsison d’energia per las cellulas. Aital un cambi de la proteïnas P27 en de mitocondrias provocariá una mai lèu recuperacion de las cellulas del còr pr’amor qu’an pus energia per o far.
La descobèrta del cambi de las proteïnas P27 èra estada produsida amb aqueste nòu estudi. E dubririá l’escasença a l’òme mas atanben a d’autres animals d’aver un còr mai fòrt amb la cafeïna. A mai, ja i avián d’estudis fachs abans qu’avián confirmat que la cafeïna donava mai de proteccion contra de malautiás coma la diabetes. Ne son divèrsas, mas la soleta excepcion es lo càncer. La cafeïna ajuda pas contra aquela malautiá.
Los scientifics qu’an realizat aquel estudi diguèron qu’èran pas d’acòrdi amb los mètges que aconselhan pas beure de cafè pr’amor que va pas plan contra las atacas de còr: “ I sèm pas d’acòrd – çò diguèt lo recercaire Joaquim Altschmied -. Totun, se pòt prene lo cafè mas tanben cal far fòrça exercici e aver una dièta sana. A mai, beure trop cafè o tè provocariá çò de contrari, la destruccion dels mitocondris e lo grop de proteïnas P27”. L’estudi es estat publicat al numeric PLOS Biology per l’Universitat Heinrich Heine de Düsseldorf, a Alemanha.
La Redaccion
