MAI MIOPIA QUE JAMAI
L’Organizacion Mondiala de la santat (OMS) considèra que la miopia pòt ja èsser classificada coma una vertadièra pandemia a tota la planeta. En divèrses païses europèus, dont l’estat espanhòl, arribèron de nòvas chifras alarmantas sus aquela malautiá visuala, car fins a sièis de cada 10 mainatges e joves la patisson. E n’i a de mai en mai.
Segon l’OMS, los nòus estudis confirmèron que los joves d’uèi lo jorn–tanben coneguts coma generacion digitala – son fòrça mai miòps que los que nasquèron abans de l’an 2000. Lo vejaire dels expèrts seriá que l’estil de vida –brica nomada- ne seriá la causa dirècta. Per ansin, lo barrament que patiguèt la populacion, sustot en Euròpa, pr’amor de la pandemia de la Covid-19 provoquèt demorar mai encara a l’ostal e doncas èsser mai temps davant l’ordinador. D’universitats de païses coma China, Canadà o Estats Units tanben afirmèron que la miopia s’espandiguèt plan al long del sègle XXI.
La principala causa
La causa ne seriá la manca de lutz solara, car los pus joves e tanben los mainatges poguèron pas sortir en carrièras al long de plusors meses. Los rais del Soleu son los responsables de liberar de dopamina dins la retina de l’uèlh e aquò ajuda a arrestar la naissença de miopia. Pasmens, pr’amor que los mainatges demorèron dins l’ostal e recebèron pas de lutz solara durant de meses, la malautiá ven mai e mai normalizada. Un d’aqueles estudis foguèt publicat al numeric The Lancet.
D’un autre costat David Musch, de l’Universitat de Michigan tanben confirmèt que los mainatges chineses son de mai en mai miòps pr’amor del barrament. Un estudi publicat al numeric Jama Network afirma que lo nivèl de miopia patit pels mainatges d’aquel país ven de mai en mai naut dempuèi l’an 2015 E fòrça mai naut dempuèi l’an 2020. La manca de lutz solara entre los enfants amb d’edats entre 6 e 8 ans ne provoquèt de chifras tras que nautas.
Val pas dire que los païses qu’an una tecnologia mai nauta, coma los europèus, son tanplan los que mai patisson aquela miopia. Per ansin, en de luòcs coma l’estat espanhòl, fins a 6 de cada 10 mainatges an de besonh de lunetas pr’amor d’aquela o encara d’autras malautiás. E pr’açò ja començan a aver de voses que demanan als govèrns europèus d’ajudas dirèctas per comprar de lunetas per aqueles mainatges car, segon dison, tanben i a de mai en mai paures dins la populacion europèa e doncas pòdon pas las comprar.
La Redaccion
