Lo govèrn francés se prepara per una creissença de mai de 4ºC de temperatura fins a l’an 2100. Es la resulta dels darrièrs estudis sus lo cambiament climatic qu’an menat a un plan d’adaptacion a la nòva realitat climatica que patiràn tanben los occitans.
Uèi per uèi, l’Euròpa occidentala es, amb lo continent asiatic, lo luòc de la planeta ont las temperaturas ja an pojat mai. En 2022, la secada en territòri francés foguèt òrra e Occitània foguèt un dels païses que ne patiguèron mai las consequéncias. Lo nòu plan governamental francés establís las restriccions d’aiga coma un besonh comun mai que mai en Occitània, mas tanben en aquela gigantassa vila del nòrd qu’es París.
Car, uèi, lo territòri metropolitan francés ja a patit una creissença actuala de mai d’1,7ºC a respècte del periòde preïndustrial. Segon lo govèrn de París, la montada de las temperaturas serà de mai de 2ºC en l’an 2030, de fins a 2,7ºC en 2050 e de mai de 4ºC en 2100.
Mai de calor pels occitans
Aquò entraïnarà d’òrras èrsas de calor que poiràn durar mai de dos meses per an, e los luòcs ont aquò serà pièger seràn Occitània e la Mediterranèa, ont se subirà mai de 90 nuèchs tropicalas (mai de 20ºC). I aurà pas pus de glacièrs e los episòdis de pluèja intensa seràn de mai en mai abituals. Aquò provocarà de grèus aigats, mas tanben una manca d’aiga, al sud e al nòrd, pr’amor que de vilhas luenhencas coma París tanben seràn las victimas aquelas terriblas temperaturas.
Lo plan governamental francés a per tòca de reduire los gases d’efièch de sarra de mai d’un 55% abans 2030. Uèi, se comparam amb l’an 1990, la França metropolitana a sonque pogut demesir aquel nombre d’un 25%. En 2022, França emetèt mai de 408 milions de tonas annadièras d’aquel tipe de gas; en 2030 caldrà evitar de superar los 270 milions de tonas. Aquò vòl dire que se tracta de reduire mai de la mitat de las emissions de gases d’efièch de sarra.
Pel govèrn francés, l’esfòrç serà demandat, mai que mai, a las entrepresas, que devon aténher la mitat d’aquel prètzfach. Los ostals particulars deuràn demesir d’un 25% lor pollucion e l’autre 25% serà per l’estat e las regions. Aquò tanben implica mai de veïculs electrics. Pasmens, lo govèrn encara deu precisar son plan e las estrategias de seguir per poder adaptar los abitants de l’estat a la nòva situacion climatica (qu’es ja practicament d’emergència) non sonque en Occitània Granda mas tanben dins tot lo territòri de França.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
