LOS TIRANOSAURES VIVIÁN EN TROPÈL
De nòvas evidéncias paleontologicas confirmarián que los tiranosaurids visquèron e cacèron en tropelada. Aqueste tipe de terapòde carnivòr demorèt entre ara fa 100 e 66 milions d’annadas en çò qu’uèi es America del Nòrd mas tanben, e segon de recents estudis, en Asia. Çò qu’èra pas conegut fins ara èra que visquèt amassa amb d’autres tiranosaurids e que tanben caçava amb eles. Per ansin, ara seriá confirmat que foguèt un caçaire pus social que çò qu’òm aviá prepausat fins ara.
L’idèia que los tiranosaures e mai que mai lo celèbre Tiranosaurus rex aguèt d’estrategias complèxas a l’ora de caçar, e qu’òm podiá parlar plan d’un reptil social, foguèt lançada en 1998 pel prestigiós cercaire canadian Philip Currie. Lo scientific estudièt mai de 12 albertosaurus trapats amassa en Albèrta, Canadà, e aquò podiá entraïnar una caça collectiva. Totun, fòrça cercaires se mostrèron contraris a aquela idèia pr’amor que consideravan que los tiranosaurids foguèron pas pro abils, car aguèron un cervèl pichon, e podián pas desvolopar d’estrategias de caça pas gaire mai complèxas que las d’un crocodil. E lo cas dels albertasaurus demorèt coma una excepcion paleontologica.
Nòvas descobèrtas
Pasmens, en l’an 2005 la tròba d’un segond luòc ont trapèron de tiranosaurids en Montana provoquèt tornar a obrir aquela polemica. Ara, los paleontològs Alan Titus e d’autres estudièron prigondament la descobèrta de las rèstas de quatre esqueletas fossilas de tiranosaure trapadas al sud d’Utah. Lor trabalh ajudèt a l’ora de poder confirmar que los reptils moriguèron al còp dins lo quite environament.
Segon aquels cercaires, aqueles quatre tiranosaurids, de l’espècia Teratophoneus currei moriguèron amassa pr’amor d’una inondacion.E aquò auriá entraïnat que, segon Currie, foguèt segur que, en tot morir amassa, demòstra un còp mai que los tiranosaurids caçavan e demoravan amassa pr’amor que visquèron en tropelada”.
Per ansin, aquela nòva descobèrta debanada en Utah donariá ara mai d’evidéncias sus la teoria paleontologica que los tiranosaurids foguèron de reptils pro complèxes e que poguèron desvolopar de comportaments socials prigonds, coma se passa, uèi lo jorn, entre los aucèls. E cal pas desbrembar que los terapòdes foguèron ancessors dels aucèls. L’estudi foguèt publicat al numeric PeerJ.
La Redaccion
