Amb la pandemia i aguèt plusors grops artistics que poguèron pas pus ofrir lor trabalh al public. Lo grop gascon Gric de Prat ne foguèt pas cap excepcion. E l’espectacle « Musics desbrembats dels Païses d’Òc » demorèt, tanben anullat. Ara, urosament, arriban de tempses nòus pr’amor que la pandemia semblariá que comença a finir. Aumens a Euròpa. E pr’açò Gric de Prat volguèt tornar a ofrir al public gascon e occitan aquel polit espectacle qu’òm poirà veire dissabte 19 de març a 20.30 h a l’Auditòri de la Mediatèca de Telhan de Medòc.
« Musicians desbrembats dels Païses d’Òc » es un bèl spectacle de Gric de Prat amb de racontes, de cançons e de lecturas d’òbras de musicians-poètas classics occitans, sovent desbrembats per la majoritat de nosaltres. Lo centre de l’espectacle se situa a la fin del sègle XVIII, quora las nomentadas províncias occitanas francesas venon mai e mai autonòmas malgrat lo centralisme de París. Una nòva epòca qu’entraïnarà tanben la creacion artistica pus bèla.
Una cultura enebida
A l’epòca l’occitan es enebit dempuèi lo sègle XVI mas totjorn contunha a demanar lo sieu drech d’existir. De musicians e de poètas espepissaràn la cultura populara per s’inspirar e crear d’òbras imitadas per tota Euròpa. E sonque París ne demorarà l’excepcion.
Son d’artistas e d’òbras sovent desbrembats mas que Gric de Prat vòl ara, amb aqueste polit espectacle tornar a rebrembar, pr’amor que son la sorça e inspiracion de la renaissença occitana del sègle XIX. L’espectacle se debanarà a l’Auditòri de la Mediatèca de Telhan de Medòc lo dissabte 19 de març de 2022 a 20.30 h e òm i poirà veire de cançons e racontes extraordinaris, cossí se debana ja fa d’annadas amb Gric de Prat.
La Redaccion
