L’ orquidèa fantauma (Polyrrhiza lindenii) es una planta perenne emicriptofita de la familha Orquidèas (Orchidaceae). Malurosament es una orquidèa en grèu dangièr d’extincion e sonque pòt òm l’espepissar en de raras colleccions de plantas. Lo sieu prètz es plan nau al mercat e foguèt tras que demostrat que pòt pas èsser cultivada en defòra del sieu ecosistèma.
Per la cultivar cal aver cèrtas condicions plan malaisidas e especialas. A de besonh èsser en defòra de l’ostal e tanben necessita fòrça umitat. Es una orquidèa classificada al Apendix II del CITES i es protegida al 100% per l’estat de Florida e las leis estatsunitencas federalas de proteccion de la flora.
Es tanben una orquidèa epifita que demòra dins una ret en tot se ligar mai e mai als arbres ont viu. Òm la pòt trobar sonque en d’airals amb de bòsques umits e en de paluns, mai que mai a Florida, mas tanben en Bahamas e Cuba. I a d’autres genres d’orquidèas que son semblantas a aquesta en asia, America del Sud e Africa, mas son pas l’orquidèa fantauma.
Una monocotiledonèa estonanta
Aquesta orquidèa, l’orquidèa fantauma, es un planta monocotiledonèa estonanta pr’amor qu’a pas de tijas e las sieunas fuèlhas son reduchas . Es una planta doncas que sonque a de rasigas planas, cossí foguèssen cordèls verds e pro. Las rasigas utilizadas per chuclar l’umitat e tanben los cloroplasts de besonh per la fotosintèsi. L’estrat extèrn, pasmens, a la foncion de chuclar los nutrients mas tanben d’aiga. E tanben es una defensa de la partida intèrna de la planta.
La flor de l’orquidèa fantauma arriba demest los meses de junh e agost e alavetz òm i poirà veire fins a dètz flors plan odorosas que naisson al còp. La flor es blanca e pòt far entre 3 e 4 cm de largor e fins a 9 cm de longor en forma d’espiga dempuèi la rasiga.
La labra bassa de la flor produsís dos petals largs que se crosan vèrs en bas en tot semblar las pautas d’una granolha que sauta. La bractèa es seca e longa, cossí foguèsse facha de papièr. La rasiga de la planta s’amassa plan a l’arbre e doncas pòt semblar qu’es al mièg de l’aire. Pr’açò recep lo nom d’orquidèa fantauma.
La pollinizacion es facha per un insècte, l’arna esfinx giganta, qu’es lo solet insècte d’aquela region qu’o pòt far plan. Òm pòt dire un pauc coma l’orquidèa de Madagascar mas amb origina americana. D’efièch, l’orquidèa de Madagascar, Angraecum sesquipedale, foguèt la planta que menèt Charles Darwin a predire qu’èra una arna (a l’epòca encara pas coneguda per la sciéncia) que pollinizava aquela planta. A l’epòca òm se trufava d’aquò mas sonque qualqu’unes ans puèi l’arna foguèt descobèrta.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
