Es tornat recentament als nòstres cinèmas l’arqueològ mai famós: Indiana Jones. E s’es afrontat tornarmai contra los nazis que volián aténher un objècte fòrça poderós. Mas quina es la vertat darrièr d’aquel argument aparegut en dos films anteriors?
L’an 1935 foguèt creada la Ahnenerbe a l’Alemanha nazi, amb lo nom oficial de “Societat per la Recerca e Ensenhament sus l’Eiretatge Ancestral Alemand”, que foncionava coma un ministèri secrèt e voliá demostrar “scientificament” la superioritat de la raça germanica mejançant la trobalha de pròvas arqueologicas que demostrèsson que los germanics èran los creadors de las civilizacions mai importantas de l’istòria de l’Umanitat.
Mas consideravan tanben que qualques objèctes arqueologics trobats, sustot aqueles que possedissián un valor sagrat e religiós podián èsser fòrça utils per las tòcas del Tresen Reich. Existissiá una anciana cresença que proclamava que la possession d’aqueles objèctes donava la victòria davant las batalhas. Lo meteis Adolf Hitler, quand èra encara jove, s’èra entosiasmat en vesent en un musèu de Viena la nomenada “lança de Longinus”, la supausada lança que segon la tradicion crestiana aviá utilizat lo soldat roman per verificar se Jèsus èra mòrt a la crotz.
Plusors expedicions
Divèrsas expedicions recorreguèron lo mond en cercant de pèças arqueologicas. Una d’elas al continent asiatic ensagèt de trobar la mitica vila de Shangrila. Una legenda assegurava que las personas se mantenián ailà dins una etèrna joventut e felicitat.
Fòrça expedicions se realizèron al continent american, en cercant de pèças arqueologicas de las culturas amerindianas, e assajar de demostrar absurdament lors relacions amb los germanics. Qualqu‘unas d’aquelas expedicions realizavan tanben de sauvatjas experiéncias scientificas amb personas per demostrar la resisténcia del còrs uman davant de situacions extrèmas (fred, calor, anequeliment…) o davant cèrtas malautiás.
E aquelas recercas aguèron tanben d‘expedicions a Catalonha e Occitània. Heinrich Himmler aviá legit dos libres publicats pel cercaire alemand Otto Rahn, “Crosada contra lo Grasal” e “La cort de Lucifèr”. Himmler li encarguèt abans de la guèrra una recerca per trobar de senhals mai fisables sus la preséncia del Sant Grasal al Lengadòc.
E lo meteis Heinrich Himmler visitèt lo monastèri catalan de Montserrat lo jorn 23 d’Octòbre de 1940, en pensant que la montanha catalana èra estat lo destin de la reliquia, amb una identificacion amb lo Montsalvat que apareissiá en qualqu‘unas legendas sul Sant Grasal. Himmler demandèt als monges per aquela reliquia, en pensant qu’èra amagada dins del monastèri. Obtenguèt pas cap de responsa afirmativa. Qualqu‘unes rumors explicavan qu’Adolf Hitler s’èra bastit un pichon santuari en una de las siás mansions per susvelhar lo Sant Grasal.
L’Ahnenerbe foguèt enebida après la fin de la Segonda Guèrra Mondiala e las atrocitats realizadas amb las experiéncias umanas foguèt una de las pròvas contra lo Tresen Reich pendent los posteriors jutjaments de Nurembèrg.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
