Una còla de cercaires assajèt de descobrir de nòus luòcs al fons de la mar en tot usar de làmias amb de camèras. Aquò ajudèt plan a cartografiar mai de 92 000 km2 de prat marin nòu près de las illas Bahamas, çò qu’es, fins a uèi, lo màger prat jamai trobat sus la planeta Tèrra.
La trobalha es tras qu’importanta pr’amor que los prats marins tanben son d’aliats dels umans per luchar contra lo cambiament climatic actual car absorbisson de CO2 coma los bòsques terrèstres. Lo prat marin fa aperaquí 92 000 km2, e aquò vòl dire que s’espandís per un territòri qu’es un pauc superior a la region majoritàriament occitana de la Nòva Aquitània. E, s’òm vòl contunhar de luchar contra aquel cambiament, cal benlèu protegir aquel prat.
L’autra caracteristica del luòc es qu’es un grand e fòrça ric ecosistèma ont i a de milièrs d’espècias de peissum e d’autres animals marins, çò que crida l’atencion de fòrça pescadors. Que pòdon far mal al prat marin. Tanben es un prat qu’ajuda plan a luchar contra l’erosion marina e tanplan contra los tsunamis. Divèrsas rasons per lo protegir lèu.
Lo mai grèu dangièr: lo torisme
Pasmens, lo mai grèu dangièr que lo poiriá afrontar aquel gigantàs prat marin es lo torisme amb sos vaissèls, mai que mai pendent l’ivèrn, car n’i arriba de milièrs. Va sens dire que la descobèrta foguèt una vertadièra capitada pels scientifics que vòlon, dempuèi alara, emplegar mai d’animals marins per explorar lo fons dels oceans.
Las donadas que los cercaires obtenguèron amb l’ajuda de làmias foguèron publicadas en mai dins lo numeric Nature Communications. L’estudi foguèt pairinat per Beneath the Waves (jos las èrsas), que dempuèi d’annadas estúdia las làmias, una espècia plan protegida pel govèrn de las Bahamas. Amb aquel estudi, se tractava de cercar de luòcs que poguèsson protegir e ajudar mai encara aquela espècia marina.
Aquel prat marin, e encara d’autres, son sovent vesitats per divèrsas espècias animalas marinas erbivòras coma de tartugas, de dugongs e encara de serenas. Sonque la preséncia de la làmia tigre arrèsta aqueles erbivòrs a l’ora de manjar tota l’èrba que i a al fons de la mar. De remembrar qu’una làmia pòt prene mai del 72% de son temps de cèrca de noiridura per trapar de tartugas, e pòdon far mai de 70 quilomètres jornadièrs per aquel motiu.
Segon los cercaires, las làmias realizèron un viatge marin mai de 2400 còps e s’aquò foguèsse estat fach per d’umans sonque seriá estat possible d’analisar e estudiar lo 5% de tot lo prat marin descobèrt. Aquò vòl dire que sens làmias l’estudi se seriá pas pogut far.
Una d’aquelas làmias pòt far fins a 5,5 mètres de longor e pesar mai de 570 kg. E contunhan d’èsser de predators dangeiroses per nòstra espècia. Après saber que las làmias tigre traversavan aquel prat, los cercaires decidiguèron d’utilizar de camèras amb eles. Las camèras èran liberadas dels predators marins un temps après, car èra plan dangeirós de tornar trapar las làmias. Un senhal ràdio ajudèt puèi a retrobar las camèras.
Fins ara, lo màger prat marin terrèstre trobat se situava en Austràlia e foguèt descobèrt en 2009 (mesura aperaquí 40 000 km2). Lo prat marin de las Bahamas pòt absorbir fins al 20% de tot lo CO2 de la planeta pr’amor que son encara de melhors aliats per la lucha contra lo cambiament climatic que la quita selva d’Amazonia.
Lo prat marin es sonque entre 10 e 15 mètres de prigondor de la superfícia de la mar, e aquò provoquèt l’estonament general entre los cercaires, perque èra pas estat descobèrt fins ara. « Coneissèm pas encara grand causa sus l’ocean, çò diguèron los cercaires. Mas tot es ligat sus la planeta, e protegir las làmias permetèt de descobrir lo màger ecosistèma marin del Mond ». Puèi demandèron de mesuras urgentas per lo protegir de las atacas dels toristas pr’amor que lucha fòrça contra la crisi climatica actuala.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
