L’ÍNDIA ES ARRIBADA A LA LUNA
Se considèra que la capitada de l’ISRO (Organizacion de Recerca Espaciala d’Índia) es istorica. Ven lo quatren país que poguèt alunir sus la Luna amb la nau Chandrayaan-3 dimecres passat. Aital, l’arribada de la nau indiana a la Luna representa un nòu capítol dins l’istòria de l’umanitat per sortir de la planeta e convertís tanben aquel estat asiatic en un país modèrn e avançat.
La capitada scientifica espaciala de la nau Chandrayaan-3 foguèt màger encara pr’amor qu’arribèt al Pòl Sud de la Luna, un prètzfach pas encara realizat per d’autres estats de la planeta. Fa pas gaire los russes tanben envièron una nau espaciala a la Luna mas capitèt pas a l’ora d’i arribar, pr’amor que semblariá que tustèt contra la superfícia lunara e poguèt pas reüssir.
De soslinhar qu’Índia ja aviá assajat d’arribar a la Luna fa quatre ans. Mas i capitèt pas. Ara Índia forma part d’un grop de pas gaire estats de la Tèrra que son arribats ailà o que i vòlon arribar lèu, amassa amb Estats Units e Russia, que ja i avián arribat fa d’annadas, mas tanben, China (2013) o encara Israel o Japon qu’an assajat d’i arribar fa pas gaire o que son a mand d’i arribar los proplèus meses pr’amor de la supausada riquesa geologica de la Luna.
Una bèla capitada espaciala
Aprés arribar la Chandryaan-3 a la Luna, sortiguèt la pichèla nau exploradora Pragyaan (sapiéncia en sanscrit). La tòca es explorar las ròcas mas tanben los cratèrs del nòstre satellit natural de biais scientific. Las primièras imatges de la Ragyaan ja son arribadas a la Tèrra e ara, çò que cal, es las estudiar per ne far d’analisis.
Segon sembla la Pragyaan a coma tòca tanben trapar de minerals per poder los estudiar. L’informacion recebuda serà enviada a la nau Chandrayaan-3, que demòra en orbita al torn de la Luna, abans de l’enviar tornarmai a nòstra planeta. La velocitat de la Pragyaan, pasmens, es pas gaire, sonque 1 cm/segonda. Totun, la nau a mai de 14 jorns de lutz solara per poder tornar cargar las bateriás. E, de remembrar que la Pragyaan a coma mission pus importanta assajar de trobar d’aiga, un pretzfach que poiriá ajudar e plan a la colonizacion de la Luna.
La Redaccion
