L’IA ja preditz que la màger part del Mond veirà las temperaturas a montar de 3°C fòrça mai rapidament que çò qu’èra previst de per abans. Tres scientifics combinèron de trabalhs sus 10 modèls climatics globals e, amb l’ajuda de l’intelligéncia artificiala (IA), concluson que l’escalfament de cèrtas regions es susceptible d’èsser atench mai rapidament que çò qu’èra estimat.
L’estudi foguèt publicat dins lo numeric Environmental Research Letters per IOP Publishing, e projècta que la màger part de las regions terrèstras superaràn segurament lo lindal critic de 1,5°C en 2040 o quitament abans. De manièra similara, divèrsas regions son en camin de despassar lo lindal de 3°C en 2060, mai lèu que previst en d’estudis anteriors.
De regions coma l’Asia del Sud, la Mediterranèa, l’Euròpa centrala e d’airals de l’Africa subsahariana, atenheràn aqueles lindals mai rapidament, çò qu’agrèuja los risques pels ecosistèmas e per las comunautats.
Una descobèrta clau
La recèrca, menada per Elizabeth Barnes, de l’Universitat Estatala de Colorado, Noah Diffenbaugh, e d’autres, utilizèt un apròchi d’aprendissatge de transferiment d’IA, qu’intègra de coneissenças de climas multiples modèls e d’observacions per afinar d’estimacions precedentas e fornir de prediccions regionalas mai precisas.
Per ansin, en utilizar l’IA, los cercaires analisèron de donadas de 10 modèls climatics diferents per predire d’auments de temperatura, e trobèron que 34 regions son susceptiblas de despassar 1,5°C d’escalfament en 2040. 31 d’aquelas 34 regions deurián aténher 2°C d’escalfament en 2040. E 26 d’aquelas 34 regions despassarián 3°C d’escalfament en 2060.
“La nòstra recèrca soslinha l’importància d’incorporar l’IA coma l’aprendissatge de transferiment en la modelizacion climatica per melhorar potencialament las previsions regionalas e provesir d’informacions accionablas los responsables politics, los scientifics e las comunautats del Mond entièr,” çò diguèt Elizabeth Barnes.
“Es important de se centrar pas sonque suls auments de temperatura globala mas tanben sus de cambiaments especifics que se passan en de zònas localas e regionalas. Quand los lindals d’escalfament regional seràn atenches, podèm anticipar mai clarament lo moment d’impactes especifics sus la societat e suls ecosistèmas, çò apondèt lo cercaire Noah Diffenbaugh. Lo desfís es que lo cambiament climatic regional pòt èsser mai malsegur, pr’amor que lo sistèma climatic es mens clar a d’escalas espacialas mai pichonas e pr’amor que los procèsses de l’atmosfèra, l’ocean e la superfícia de la tèrra crèan d’incertituds sus cossí exactament una region respondrà a l’escalfament a l’escala globala.”
La Redaccion
Fotografia Principala: U.S Geologic Survey/CC.
