D’evenements traumatics divèrses pòdon entraïnar un envielhiment de las cellulas restacadas al sistèma immunitàri. Pòdon èsser d’evenements restacats amb lo trabalh, de problèmas grèus o la meteissa vida vidanta. Aquò provòca un envielhiment dirècte d’aquelas cellulas e èsser la causa segura de divèrsas malautiás umanas coma de malautias cardiovascularas, d’infeccions coma la COVID-19 o encara un risc màger a l’ora de patir de càncer. Aquò es la resulta d’un nòu estudi que vòl soslinhar las causas per arrestar abans las conseqüéncias.
Per ansin, perdre la trabalh, èsser discriminat o aver de grands problèmas amb de solucions malaisidas poirián èsser la causa dirècta d’un envielhiment del sistèma immunitàri, çò qu’entraïnariá aver un risc mai naut de patir de malautiás grèvas. L’estudi foguèt realizat per diferentas universitats estatsunitencas amb lo meteissa resulta. L’estudi foguèt publicat al numeric Proceedings of the National Academy of Sciences (PNAS).
“Al mond i a de mai en mai personas amb mai edat. Assajar de comprene perqué d’unes patisson de grèvas malautiás e d’autres pas èra doncas plan important, çò diguèt Eric Klopack, de l’Escòla de Gerontologia USC Leonard. E l’estudi vòl ajudar a confirmar los mecanismes que provocan un envielhiment del sistèma immunitàri uman”.
Un declin restacat amb l’edat
Aver mai d’edat vòl dire tanben patir un declin al sistèma immunitàri. Aquò tanben vòl dire aver mens de cellulas blancas en sang e mens de cellulas nòvas. Que pòdon luchar mens quand arriva una malautiá. L’envielhiment del sistèma immunitàri es estat ara dirèctament restacat amb patir de càncer a mai d’autras malautiás coma la pneumonia. L’estudi fach ara aviá coma tòca conéisser plan se patir un grand estranci podiá èsser restacat amb un declin del sistèma immunitàri. La resulta foguèt positiva, malerosament.
Per aquò trobar los cercaires amassèron una gigantassa quantitat de donadas del Departament de Santat de l’Universitat de Michigan dont de donadas economicas, de santat, familhalas e professionalas. Per mesurar lo nomenat estranci social los scientifics analizèron la responsa de 5.744 adultes de 50 annadas d’edat. Puèi lor nivèl d’estranci foguèt analizat a travèrs de l’estudi de las sieunas cellulas en sang. Per aquò far usèron una tecnica nomenada citometria.
Cossí sospechavan los cercaires, las personas amb mai d’estranci avián un perfil immunitàri pus flac amb mens cellulas nòvas e mai de vielhas. Aver una dièta paura e far pas gaire d’exercici fisic tanben èra un factor important per patir aquel nivèl bas de cellulas immunitàrias. “Los que patisson mai d’estranci social an tanben totjorn una dièta mai paura e un tipe de vida plan mens san, çò confirmèron los cercaires”.
En mai d’aquò, aquel tipe de personas tanben podián patir mai aisidament un citomegalovirus, çò es un virus asimptomatic uman que provòca un envielhiment mai rapid de la las cellulas del sistèma immunitèri. Es un virus, çò apondèron los scientifics, qu’es totjorn present mas que pòt dormir plan e quora las personas patisson un grèu estranci pòt se revelhar. Totas las universitats que participèron en aquel estudi arribèron a la meteissa conclusion: l’estranci es causa dirècta de poder patir de grèvas malautiás mortalas. Çò que cal far per o arrestar seriá aver una fòrça mentala màger.
La Redaccion
