L’ANTIUNIVÈRS PÒT EXPLICAR L’ESPANDIMENT DE L’UNIVÈRS
Segon un nòu estudi scientific i auriá, al costat de l’Univèrs, un Antiunivèrs parallèl que poiriá explicar lo perqué del mistèri de l’espandiment accelerat del nòstre Univèrs. La resulta de l’estudi suggerís qu’aquò se debana sens que siá necita l’energia escura.
Car l’Univèrs e lo sieu espandiment de mai en mai rapid es encara uèi un dels màgers mistèris de la sciéncia actuala. La majoritat de teorias d’a l’ora d’ara restacan aquel espandiment amb l’efièch provocat per l’energia escura. Totun, jamai non foguèt demostrada l’existéncia d’aquesta e pas totes los cercaires son d’acòrdi per afirmar qu’aquel espandiment a per causa l’energia escura.
Lo nòu estudi suggerís que l’Univèrs es doble. E que i a una relacion demest l’Univèrs e l’Antiunivèrs que provocariá l’espandida universala. E doncas, cal pas pensar en d’energia escura per poder explicar aquel fenomèn.
L’Univèrs d’Hubble
Edwin Hubble descobriguèt que l’Univèrs es en movement. Sa velocitat d’espandiment, tanben coneguda coma Constanta d’Hubble, es encara un mistèri per la sciéncia. E los scientifics sabon pas tanpauc cossí pòt èsser mesurada. Aquò es la dicha Tension d’Hubble.
Una teoria actuala ditz que la velocitat de movement universala es de 73 km/s/Mpc (megaparsec). Pasmens, lo modèl nomenat ΛCDM afirma qu’aquesta es de sonque 67 km/s/Mpc. Aqueste modèl ditz que l’Univèrs es fach d’un 70% d’energia escura, d’un 25% de matèria escura e d’un 5% de matèria comuna.
Lo modèl ΛCDM prepausa que l’energia escura provòca aquel espandiment. Pasmens, la quita existéncia de l’energia escura e de la matèria escura son questionadas per qualques cercaires pr’amor que jamai non son estadas trapadas de per abans.
D’autras teorias, dont la de Naman Kumar de l’Institut Indian de Tecnologia, confirman que i a un espandiment, mas pas pr’amor de l’energia o la matèria escuras. Segon Kumar, l’Univèrs e quicòm mai espeliguèron pendent lo Bing Bang e lor movement es contràri al nòstre Univèrs.
Mas tot aquò ja es intrar sonque dins lo mond de las teorias. Per plusors cercaires, cada particula de matèria a una particula d’antimatèria al costat que se destruson quand se tròban. Aquò menèt qualques cercaires a dire que l’Univèrs a un autre univèrs al costat que fonciona a l’envèrs. Mas que nasquèt pas al meteis moment mas benlèu un pauc mai tard.
Segon aquesta teoria, l’espandiment actual universal es doble, car l’univèrs e l’antiunivèrs son un parelh, e las donadas confirmarián aquel espandiment doble. O estudiar pòt dobrir l’accès a de nòvas descobèrtas per melhor comprene un univèrs que ganha cada còp en complexitat e pèrd en naturalitat.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
