Quan pensem qual poiriá èsser l’animal mai long de la planeta, los primièrs animals qu’avèm al cap son de sèrps o benlèu ede balenas. Mas cal estudiar se aquò es vertat e se aquestas son o paslos animals mai longs del Règne Animal. Benlèu aurèm un estonament s’aqueste n’es un autre.
En abril d’ongan de trabalhadors trobèron en Pemang, Malasia, una sèrp piton reticulada que fasiá fins a 8 mètres. Paucs jorns après la piton moriguèt e se poguèt pas certificar scientificament quina èra la longada d’aqueste animal. Lo recòrd mundial l’a una sèrp piton que demora a Kansas, Estats Units, e que fa 7,67 mètres de longor.
“Fòrça còps, la longor de las sèrps es pas vertadièra – çò ditz Dan Natusch, de l’Universitat de Sidney . Ai estudiat fins a 8000 pèls de sèrps e pensi que la piton poiriá far 8 mètres de longada e pro. Lo recòrd es una piton trobada en 1900 que fasiá 10 mètres en Sulawesi, mas podèm pas saber se es vertat o pas”.
Animals encara mai longs
Totun, la sciéncia confirma que i an de sèrps coma la piton de ròca o l’anaconda verda que son encara mai longas que la piton. Los abitants tradicionals de la Sèlva de l’Amazonia an ditz totjorn qu’aquestas avián de longadas terriblas. Mas saber s aquò es vertadièr es pas possible pr’amor que i a pas mai de donadas. Segon Natusch, l’anaconda verda poiriá far mai de 8 mètres mas malurosament se n’es trobada pas mai cap aital.
Al delà d’aquò, las balenas blavas son plan mai longas que las sèrps. La mai longa es una caçada a l’Atlantic Sud e que fasiá 33,58 mètres de longor. Après avèm la medusa Cap de Leon (Cyanea capillata) que pòt arribar a far segon testimònis fins a 60 mètres ! E un calamar pescat a Massachusetts, totun, fasiá 36,5 mètres de long amb los sieus tentaculs.
Mas lo mai long de totes es un tipe de vèrme que demora en Anglatèrra, Lineus longissimus, prèp de l’aiga e a la còsta oèst anglesa. En 18640 ne foguèt trobat un que fasiá 55 mètres de longada. Vertat o legenda ? La sciéncia, uèi lo jorn, pòt pas dire encara la darrièra paraula sus aquò.
Christian Andreu
