L’ANCESSOR DE LUCY
Divèrses cercaires podèron rebastir cossí foguèt la fàcia d’un Australopithecus anamensis, ancessor de totes las espècias d’australopitecus. Tot aquò foguèt possible après trapar lo cran d’un especimèn d’aquela espècia que visquèt fa 3.8 millions d’annadas a Woranso-Mille, a Etiopia.
Segon la paleoantropologia l’espècia Australopithecus anamensis foguèt l’ancessor primièr de totas las espècias posterioras d’Australopitecus dont la celèbra Lucy, una Australopitecus afarensis que demorèt a Africa fòrça temps puèi. Fins ongan la sciéncia sonque trapèt divèrsas dents e un tròç de maissa d’afarensis e l’espècia èra pas estada estudiada amb prigondor. La descobèrta d’aquel nòu fossil, totun, dubrís la pòrta a una melhor coneissença dels ancessors dels Australopitecus.
Lo cran trobat a una edat mejana de 3,8 millions d’ans, çò que vòl dire qu’aquel especimèn visquèt en aquela region d’Etiopia fa entre 4,1 e 3,6 millions d’annadas, quand d’Austrapitecus anamensis donèron pas als Australopitecus afarensis. Lo cran ajudèt plan a rebastir la fàcia d’aquela espècia e tanben conéisser qu’ambedoas espècias d’Australopitecus visquèron amassa aumens 100 000 annadas, çò que confirmariá que lo cambiament foguèt gradual.
La còla que rebastiguèt la fàcia d’aquel primièr ancessor de totes los Australopitecus trabalhèt al luòc pendent mai de 15 annadas e trapèt lo cran en 2016 (tanben conegut coma MRD-VP-1/1 ). Puèi los scientifics comencèron a analizar lo cran per assajar de conéisser l’edat de l’individú e l’environament ont visquèt. La resulta de lor trabalh foguèt publicada al numeric Nature.
Un projècte qu’es demorat decadas
L’estudi e classament d’aquel cran fa partida del projècte conegut coma Woranso-Mille e se passèt a la region centrala d’Etiopia d’Afar dempuèi 2004. Lo projècte amassèt, a mai, mai de 12 600 fossils de divèrsas espècias animalas dont 85 mamifèras. Tanben trobèron d’aperaquí 230 espècias omininas que visquèron a la region entre fa 3,8 e 3 millions d’annadas. Segon los cercaires trobar aquel cran foguèt una tròba estonanta.
Lo cran foguèt trapat dins un depaus de sabla pròche a un dèlta d’un flume que i aguèt a l’epòca a la region. La fin del flume qu’èra alavetz un lac e ailà visquèt aquel Australopitecus anamensis. “Aquel especimèn visquèt en una region plan seca, çò confirmèt Naomi Levin, de l’Universitat de Michigan. Ara, amb l’estudi prigond qu’avèm fach coneissèm plan l’environament, la vegetacion e lo clima de la region en aquela epòca”. Poder confirmar qu’aquela espècia, pr’amor de la descobèrta d’aquel cran e son classament, visquèt amb l’espècia de Lucy durant 100 000 e son environament seriá, segon los cercaires una descobèrta importanta qu’ajuda conéisser melhor encara l’arbre evolutiu dels ancessors dels umans pendent aquela epòca.
La Redaccion
