Malgrat que la majoritat dels cercaires ja prevegèsson que la crisi environamentala actuala seriá pièger los proplèus ans, mai d’un pensava pas qu’aquò poiriá arribar abans e d’un biais tan lèu. Pr’amor que de nòvas donadas d’un recent estudi confirman que ja avèm mai de mièg gras per rapòrt a l’epòca pre-industriala e que la temperatura mondiala poiriá venir 1,5 gras mai nauta pendent los proplèus cinc ans.
Aquò deviá èsser la temperatura que los estudis scientifics confirmavan que i poiriá aver en la Tèrra en l’an 2030. Mas ara i a un 40% mai de possibilitats qu’aquò siá real abans de 2025 e òm poiriá ja patir un 90% de possibilitats que l’estiu d’ongan venguèsse lo mai caud jamai registrat entre ongan e l’an 2025.
Aquesta es la prevision oficiala de l’Organizacion Meteorologica Mondiala que tanben demandèt un cambiament de conducha de totes los abitants e nacions de la planeta. Val pas dire que la conseqüéncia d’aquò seriá plan grèva per l’umanitat e la planeta tota. Segon aquesta organizacion i auràn mai d’auragans e ciclons tropicals e tanplan mai d’incendis gigantasses, e mai de pluèja, al còp, sus Austràlia e lo Sahèl, e mai secada als Estats Units dont d’autres efièchs climatics.
Un cambiament mondial
Sonque doas regions de la planeta patirián pas aqueles efièchs climatics segon los cercaires d’aquel estudi, los oceans meridionals e l’Atlantic Nòrd. “Lo mond es vengut mai caud de çò que pensàvem, çò diguèt Petteri Taalas, secretari general d’aquela organizacion climatica internacionala. Lo problèma pus grèu es que la creissença de la temperatura mondiala se poiriá desbocar ongan pr’amor qu’es lo doble que la de l’annada passada. Son de chifras realas que devon entraïnar un avís final als govèrns de la planeta”.
Segon aquelas donadas la temperatura mondiala poiriá créisser mai d’1,5 º almens un còp entre l’an 2021 e l’an 2025 mas òm pòt pas dire se aquesta creissença globala de la temperatura de la planeta serà definitiva o pas. E pr’açò cal decidir qué far lo proplèu novembre en Glasgow, scenari de la proplèu amassada de Nacions Unidas sul Cambiament Climatic. Segon la majoritat de cercaires, las negociacions qu’ailà se pòdon debanar, serián decisivas a l’ora d’empedir que lo cambiament climatic venga mai desbocat.
La Redaccion
