L’illa Decepcion es la lar de milièrs e milièrs de pingoïns que demòran a l’archipèla de Shetland del Sud, al nòrd-oèst de la peninsula antartica. Lo paisatge de l’illa es estonant pr’amor que foguèt bastit per un dels tres volcans que i a, uèi lo jorn, en Antartida.
L’illa a una curiosa forma amb de ribas volcanicas, de glacièrs de cendra e de plajas amb de fum a l’entorn de la caldera del volcan, inondat per d’aiga de la mar de Flòta.
Navegar fins a dins del volcan
Lo volcan de l’illa es pas pus actiu, mas i aguèron d’erupcions volcanicas espepissadas encara en 1970 e un dels traches pus importants de l’illa es que los vaissèls i pòdon dintrar dirèctament al centre del volcan. E aquò se debana sonque aquí e pas en gaire luòcs mai de la planeta.
L’illa Decepcion es lo principal volcan actiu situat a l’estrech de Bransfield, que tanben fa partida del rift de Bransfield, una granda fendilha de l’escòrça terrèstra de mai de 800 quilòmetres de longor.
L’illa Decepcion a una forma gaireben circulara pr’amor de la siá origina volcanica e a un diamètre circular mejan d’aperaquí 15 quilomètres. A mai, a l’illa i a tres montanhas pas gaire nautas; lo Mont Bynon (332 mètres), lo Mont Kirkwood, amb 452 mètres, e lo Mont Pond (539 mètres), lo mai naut de tota l’illa.
Una granda baia
A l’interior de l’illa i a una granda baia, Port Foster, amb una pichonèla dubertura de 150 mètres ont i pòdon dintrar de vaissèls dempuèi l’exterior. Pasmens, cal susvelhar plan car òm pòt trucar amb la ròca Ravn, situada al mièg d’aquel pichon canal e a sonque dos mètres de prigondor.
L’illa se creèt pendent lo periòde quaternari pr’amor de l’erupcion d’un grand volcan qu’a fins a 850 mètres de prigondor e un diamètre de 30 quilomètres cairats. La part de tèrra que i a sul nivèl de la mar es cobèrta per de glacièrs (mai del 50% del territòri) dont qualqu’unes son coneguts coma de glacièrs negres pr’amor de la siá color volcanica.
Dins la baia podèm soslinhar la Calanca dels Balenièrs, la Calanca de la Pendula, la Baia del Telefòn o encara l’airal exterior de l’illa conegut coma Punta Macaroni o Ròca Nòva. A l’illa i a divèrsas lònas termalas que pòdon èsser tanben visitadas pr’amor que la temperatura de l’aiga de la baia de Pòrt Foster es plan mai nauta que la de la mar que i a al torn de l’illa.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
