La reserva naturala de Yuganski es situada a Rusia dins la zòna euroasiatica, a la partida centrala de l’oèst de Siberia. Foguèt creada en 1982, e classada coma una reserva ecologica, çò que vòl dire qu’es enebit la crosar amb de veïculs.
La reserva es dins la val del flume Bolshoi Yugan, un afluent de l’Obi, e a un airal de mai de 648 km² de tèrras bassas de l’Obi mejan, al districte de Surgutski, qu’aperten al districte autonòm de Janti-Mansii, a mai de 500 km de la vila d’Omsk.
Lo terren es format generalament per d’estrechas vals e i a fòrça rius amb de paluns. Lo 64% de la reserva es cobèrta per de bòsques e la rèsta son de paluns. A l’airal i demòran mai de 40 espècias desparièras de mamifèrs, dont orinhals e rens mas atanben i a lops-cervièrs, de goluts e d’orses.
Una reserva barrada
Lo clima es continental, çò que vòl dire que i a una tras que nauta umitat. La majoritat dels vents son del sud e sud-oèst e la reserva sonque es liura de glaç 92 jorns l’an. Normalament es barrada al public e sonque i pòdon dintrar scientifics e trabalhaires environamentals amb l’acòrdi de l’administracion del pargue.
Al vilatge d’Ugut i a un pichon musèu de la natura que vòl educar sus l’environament lors abitants. A mai, foguèt dubèrta fa gaire una rota ecotoristica dins l’airal ont i a los paluns que pòt èsser visitada tanben sonque amb l’acòrdi de l’administracion de la reserva.
Mas es una reserva naturala qu’encara demora plan lonhana del trafic e los projèctes d’educacion environamentala que si fan son sonque a Internet per entraïnar una mendre publicitat de la zòna. Per i dintrar o far quinsevolha autra activitat restacada amb la reserva de Yuganski cal doncas parlar primièr amb l’administracion del pargue, al vilatge d’Ugut, a mai de 300 km al nòrd de la vila de Surgut : un bon biais de protegir l’environament de l’airal.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
