Ua perilhosa espècia non autoctòna, la hromiga de huec (Solenopsis invicta) qu’ei estada trobada, peu purmèr còp, a Euròpa, e qu’ei estada balhada l’alèrta, pr’amor qu’ei ua espècia envasidora e plan perilhosa entà l’environament. Milèrs de hromigas de huec que son estadas trobadas a l’isla de Sicília e los expèrts qu’avisan qu’ei plan mauaisit de poder acabar dab aquera espècia.
La hromiga de huec qu’ei ua espècia originària d’America deu Sud e qu’ei nommada de huec pr’amor de la dolor deus sons nhacs, qui pòden arribar a provocar de grèvas reaccions au noste sistèma de defensa. Segon mantun cercaire, la hromiga de huec que pòt estar considerada com ua de las pégers espècias envasidoras de la planeta. E, pr’amor d’açò, que demandan dejà a l’administracion atacar dejà las hromiguèras si’s vòu acabar dab l’espècia abans n’ès pas tròp tard.
Deus milèrs en Sicília
La hromiga de huec qu’ei estada descobèrta a l’isla italiana de Sicília per un grop catalan d’expèrts de l’Institut de Biologia Evolutiva. Lo resultat de la descobèrta qu’ei estada publicada au numeric scientific Current Biology. Segon los cercaires, que trobèn dinc a 90 nis en mensh de 5 ectaras dens ua estenuda pròcha d’un fluvi. E cada nis qu’avèva detzenats de milèrs de hromigas de huec. La soa origina, segon la genetica, que seré, Estats Units o China.
Puish, los cercaires balhèn l’alèrta pr’amor que la soa preséncia au continent europèu pòt entrainar grèvas consequéncias entà l’environament e tanben entaus umans. Los cercaires tanben que comencèn d’estudiar los vents de la region, pr’amor qu’ei la causa naturau prumèra utilizada per las hromigas de huec entà migrar.
Segon aqueth estudi, dinc a un 7% deu territòri europèu que poiré recéber de hromigas de huec lèu. E dilhèu mei enqüèra, pr’amor deu cambiament climatic actuau patit peu noste continent. E aquò que poiré tanben provocar l’expansion de l’espècia en dinc au 50% deu territòri europèu.
Un deus màgers problèmas qui provocaré la hromiga de huec que seré lo domau que l’espècia poiré provocar au lòc on vòu víver, dab l’extincion de plusors espècias de fauna indigèna e lo cambiament de l’ecosistèma. La hromiga de huec, tanben, qu’ataca las rasics de las plantas e tanben las mucosas deus animaus joens. Los Estats Units que pateishen de faiçon annau mei de 6 bilions d’euros de pèrtas pr’amor d’aquera hromiga.
Pr’açò, que cau bastir planas entà las eradicar. Austràlia que despensè dejà de milions de dòlars entà las eradicar mes shens succés. Solament Navèra Zelanda s’i escadó pontuaument d’eradicar aquera espècia. E que cau har tanben inspeccions periodicas entà destrusir los nis. E susvelhar que non i a naus nis. Pr’açò los cercaires que demandèn ajuda aus abitants deu lòc car cau conéisher plan las zònas envasidas a la region.
La Redaccion
