LA FAMILHA DE T. REX
De paleontològs an descobèrt de fossils de dinosaures de la familha de T. Rex en Marròc. La descobèrta confirma una plan granda diversitat en aquel tipe de dinosaures en Africa del Nòrd, abans la fin del Cretacèu. E, segon çò que dison, benlèu encara pus nauta qu’en America del Nòrd.
Las esqueletas trapadas son parcialas, de dos especimens situats a Ouled Abdoum, près d’un depaus de fosfats. A la fin del Cretacèu i aviá una mar tropicala pauc prigonda e la majoritat dels fossils trobats ailà son de fossils marins: de peissum e de crocodils, mas tanben de tartugas e de reptils marins, coma d’elasmosaures e de mosasaures, e tanben de làmias.
Fins ara, en aquela region sonque èran estats descobèrts de dinosaures de tres espècias: d’adrosaures (Ajnabia odysseus), de titanosaures e d’abelisaures (Chenanisaurus barbaricus). Aqueste darrièr amb de mesuras estonantas (près de 9 mètres de long). Ara son estadas descobèrtas doas nòvas espècias d’abelisaurids, de carnivòrs bipèdes que semblan plan T. Rex, pr’amor del sieu mòrre, plan cort, e de braces tanben fòrça corts.
Lo primièr d’aquestes foguèt trapat a Sidi Daoui, e es l’òs del pè d’un dinosaure adulte de 2,5 mètres de long. Lo segond especimen foguèt descobèrt pr’amor de la trobalha d’un tíbia, e aperten a un especimen d’aperaquí 5 mètres de long e trobat a Sidi Chennane. La descripcion de totas doas espècias es estada publicada dins lo numeric Cretaceous Research.
Una diversitat estonanta
Segon la resulta de l’analisi d’aqueles fossils, sembla que, dins la region, i demoravan plusors espècias erbivòras mas tanben carnivòras, çò qu’implica una granda diversitat. Non luènh d’Ouled Addoum, los paleontològs trapèron fa gaire un grand nombre de dinosaures fossils que semblarián èsser un pauc pus ancians (100 milions d’ans).
Encara uèi lo jorn i a de cercaires que creson que los dinosaures, a mai d’un fin òrra pr’amor del meteòr Chicxulub, patiguèron l’escantiment en causa d’una tròp flaca diversitat. Totun, aquel fenomèn es sonque estat trobat en America del Nòrd e ara i a de cercaires qu’afirman, benlèu de mai en mai, qu’aquò rebat pas la vida vidanta dels dinosaures en d’autras zònas del Mond.
Un article de Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
