Un nòu estudi –sus un fach benlèu conegut per totes– a confirmat que la dièta mediterranèa pòt ben èsser restacada a un risc plan mendre de patir cèrtas malautiás coma la deméncia. Aquò arribariá pr’amor de l’ingestion d’aliments coma lo peissum, la frucha o encara, de fruches secs. Segon los cercaires, la dièta mediterranèa poiriá reduïre aquel risc de fins a un 25%.
L’estudi foguèt realizat per una còla de cercaires de l’Universitat de Newcastle, que confirmèron la reduccion de fins a un 23% de deméncia s’òm aviá aquel tipe de dièta d’un biais regular. L’estudi foguèt publicat dins lo numeric BMC Medicine, e es un dels màgers estudis jamai realizats sus aquel tipe de dièta.
Un estudi que durèt mai de 10 ans
Aital, per poder far aquel estudi scientific, los cercaires analisèron de donadas de fins a 60 298 individús del Reialme Unit mas tanben d’autres païses europèus. Los cercaires realizèron aquel estudi durant mai de dètz ans. Pendent aquel temps i aguèt fins a 882 cases de deméncia dins aquel grop de personas.
Après estudiar lo patrimòni genetic dels malauts, tanben analisèron la siá dièta. Justament un d’aqueles cercaires confirmèt que la deméncia es una malautiá que patisson uèi lo jorn de milions de personas sus la planeta mas que pòt èsser prevenguda. E una manièra d’o far es seguir cèrtas diètas: “ Aver una dièta mediterranèa pòt èsser una bona estrategia per demesir lo risc de deméncia”, çò diguèron los cercaires.
A mai, los mètges afirmèron que cèrtas personas córron un risc màger de deméncia en causa del lor eiretatge genetic, mas que tanben pòdon reduïre aquel risc amb una dièta mediterranèa. Pasmens, la còla de cercaires prepausèt que se faguèsse mai d’estudis sus la dièta mediterranèa per qu’aquò se confirmèsse d’un biais definitiu.
D’efièch, los cercaires reconeguèron que las personas estudiadas èran sonque de britanicas o d’irlandesas, e que totas èran blancas, e que caliá doncas far un estudi espandit a d’autras etnias d’autres païses europèus. Segon los cercaires, la dièta mediterranèa sembla d’èsser excellenta per la santat, pr’amor de l’ingestion de fòrça aliments d’origina vegetala.
Per Janice Ranson, de l’Universitat d’Exeter, “ la dièta mediterranèa es tras que rica en frucha, vegetals, granas e bon gras, e aquò es un bloquièr contra cèrtas malautiás coma la deméncia, malgrat la genetica. Seriá un tipe d’arma culturala per luchar contra los nòstres pròpris gèns”.
La Redaccion
