JAPON ARRIBÈT PAS A LA LUNA
Malgrat que totes los uèlhs occidentals èran en tot espepissar se la nau estatsunidenca SpaceX podiá s’enlairar plan – es lo màger coet jamai bastit per l’umanitat –, un autra estat asiàtic, Japon, assajèt d’arribar ièr al ser amb la nau Hakuto-R sus la superfície lunara en çò qu’an nomentat coma Primièra Mission (Mission 1). Es lo primièr còp qu’una nau comerciala privada assjaava d’arribar a la Luna de la man dels japoneses e tanben de la planeta tota.
Aprés sortir de Cap Canaveral, la nau M1 arribèt a las 01.40 oras a la Luna en çò que foguèt una demostracion dels japoneses qu’avián tanben una granda tòca al satellit terrèstre. La mission formava part d’un projècte màger japonès, çò es far arribar d’astronautas japoneses abans de 2030 a la Luna.
Lo camin fins aicí foguèt pas aisit pels japoneses. Lo mes passat l’Agència Aeroespaciala d’Exploracion Japonesa (JAXA) perdèt lo coet H3 aprés sortir a l’espaci. En octubre passat ne perdèron un autre.
La nau M1 fa sonque 2,3 mètres de nautada e foguèt en orbita sus la Luna, a mai de 100 Km de la superfícia del satellit a una velocitat de 6,000 km/ora segon confirmèt lo Cap del Departament de Tecnologia d’aquela entrepresa, Ryo Ujie, abans d’assajar d’aterrar sus la Luna.
Segon Ujie lo màger dangièr èra arribar amb la velocitat drecha per patir pas un accident sus la meteisssa superfícia lunara. Cal rebrembar qu’abans sonque Estats Units, l’Union Sovietica e China poguèron aquò far e capitar. Índia e Israel tanben o assagèron fa pas gaire mas capitèron pas.
Aprés aterrar a l’airal conegut coma Mare Frigoris, la nau M1 deuriá enviar una pichonèla nau exploradora terrèstre qu’a las mesuras d’una pilòta de baseball. La nau M1 a una bateria plan potenta per poder aquò far. La tòca èra explorar la superfícia lunara e aver mai de donadas per futurs viatges espacials. Pasmens, pas gaire aprés de l’aterratge los japoneses perdèron lo senhal de la nau e confirmèron que la meteissa espeliguèt sus la superfícia lunara. 
Lo futur pròche
Japon vòl, aprés aténher aquela tòca, enviar una autra nau a la Luna en 2024 e dempuèi 2025 collaborar amb la NASA per començar a bastir una basa lunara que deuria èsser una realitat en 2040. Totes aqueles projectes fan part del desvolopament de la nova política nacionala de seguretat e de defensa del territòri japonés a mai d’una nova politica de conquista espaciala.
La Redaccion
