GOOGLE A MAI DE 20 ANS
Malgrat que la costuma pòsca far pensar que i aja de causas que son estadas totjorn aquí, es pas lo cas de Google, un cercador informatic qu’utilizan de milions de personas sus la planeta de manièra jornadièra. D’efièch, ara farà 21 ans que Google nasquèt. E mai i aja d’alternativas pro bonas, contunha d’èsser lo cercador mai utilizat per la majoritat d’umans del Mond entièr.
Google Inc. n’es l’entrepresa proprietària e foguèt fondada en setembre de 1998. Lors fondadors ne foguèron los estatsunidencs Larry Page e Sergey Brin, alavetz dos estudiants de l’Universitat d’Stanford. Un pauc abans, avián trapat cossí crear un cercador informatic a travèrs d’un òrdre condicionat per lo nombre de vesitas.
Google es pas sonque un cercador en linha –lo pus utilizat de la Tèrra– mas es tanben una entrepresa qu’ofrís maites servicis informatics, dont un cercador de prèses, un servici de corrièr electronic (Gmail, qu’es tanben un dels pus utilizats al Mond) o un servici de mapas basat sus son celèbre Google Earth, entre d’autres.
Son fins a 45 servicis desparièrs qu’ofrís Google uèi lo jorn, en 2019, e demest aquestes n’i a mai d’un que son celèbres sus tota la planeta: Youtube, Google Analytics (per analisar las donadas d’un sit Internet), Google Translate (per revirar de lengas) o encara Google Books.
Contunha sa creissença
Es evident que, dempuèi sa creacion, ara fa 21 ans, l’entrepresa Google Inc. a pas quitat de créisser: en 2006, crompèt per 1,65 miliard de dolars Youtube e en 2007 l’entrepresa Android. Aquò menèt Google a venir l’entrepresa mai fòrta de la planeta amb una valor de 66 miliards de dolars, pus encara que d’autras multinacionalas coma Microsoft, General Electric o Coca-Cola.
Lo servici principal, Google, es lo cercador pus usat uèi lo jorn dins Internet. Amb aqueste se pòt trobar lèu-lèu tot çò qu’un uman pòt cercar, e a un indèx de mai de 8 miliards de paginas Internet. Segon la quita entrepresa, mai de 2 miliards de personas l’utilizan cada jorn.
Lo nom de Google a per origina la fusion dels mots gogòl (10100) e goggles («lunetas de proteccion» en anglés) e actualament la societat prepausa tanben un servici de nòvas per 14 païses diferents dont los Estats Units, l’estat francés, Alemanha o Austràlia.
En 2004, Google presentèt lo servici de corrièr electronic Gmail, que venguèt lèu plan conegut pr’amor que balhava fins a 2 gigabytes de memòria (e la concurréncia alavetz sonque tre 2 e 6 megabytes). Puèi venguèron Google Chrome, Google Earth e Google Maps. Es doncas un dels gigants de l’informatica de nòstre temps, mas es pas totjorn estat aquí. A solament 21 ans.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
