ESCOTAR AMB D’ESCOTADORS ES FÒRÇA PERILHÓS PER L’AUSIDA
Segon un recent estudi, mai d’un miliard de joves de la planeta poirián patir puèi de problèmas grèus de l’ausida pr’amor de l’usatge d’escotadors e de cascos personals a mai d’autras aisinas. Aquò es una de las piègers resultas de l’usatge d’aquel tipe de nòva tecnologia entre los mai joves.
D’efièch, las chifras actualas sus aquel tipe d’usatge teconologic son ja brica bonas, amb entre un 23,81% e un 48,20% dels pus joves que ja reconeisson emplegar aquel tipe de tecnologia. Aquò situariá lo nombre total de joves sus la planeta que poirián patir de problèmas d’ausida fins a mai 1,35 miliard, segon lo darrièr estudi.
En mai d’aquò, l’OMS (Organizacion Mondiala de la Santat) estima que fins a 430 milions de personas aurián ja patit una cèrta pèrda d’ausida en causa d’aquel tipe de tecnologia, e que cal far quicòm per empachar una creissença, que poiriá doblar, del mond que son victimas de problèmas auditius pr’amor dels escotadors personals.
Una tecnologia tanben perilhosa
Per ansin, escotar de sons amb d’escotadors personals es un risc de pèrdre l’ausida que ja en l’an 2015 l’OMS avertiguèt que poirián patir mai d’1,2 miliard de joves, puèi qu’aquela utilizacion es totjorn estada considerada coma pas brica sana. L’usatge de nòvas tecnologias inclutz los telefòns mobils, los MP3 o encara d’escotadors per escotar de musica a mai dels decibèls actuals dins de discotècas, bars o clubs.
De remembrar que la pèrda d’ausida se fa totjorn segon la durada e la frequéncia del son recebut. Lo limit normal abans de patir de dificultats auditivas es d’80 decibèls pendent 40 oras setmanièras, que pòdon variar segon la region e lo país. Uèi i a de milions de joves qu’escotan de musica amb d’escotadors a una mejana de 105 db, e d’unes encara mai, amb fins a 112 decibèls. E aquò es un grand dangièr per l’ausida e mai se l’escotada dura pauc de temps.
La còla qu’a realizat aquel nòu estudi es de l’Universitat de Carolina del Sud, e an analisat de milièrs de donadas en diferentas lengas sus de joves d’entre 12 e 34 ans qu’emplegavan pendent de longs periòdes d’escotadors personals. La resulta n’es qu’entre 19 046 participants a divèrses estudis anteriors, la mai fòrta majoritat aurián un risc segur de patir de grèus problèmas auditius en causa de l’usatge d’aquela tecnologia.
Dins la populacion actuala de joves amb d’edats situadas entre los 12 e los 34 ans, çò es mai de 2,8 miliards de personas, gaireben mai de la mitat son en dangièr de patir de problèmas auditius lèu perque fan servir aquel tipe de tecnologia. Segon aquel estudi, los joves qu’utilizan d’escotadors personals es mai naut cada an (entre un 24% e un 48% de mai) e lèu lo nombre total de joves que poirián patir de dificultats d’aquela mena arribariá als 1,35 miliard.
Los cercaires demandan a la societat civila d’arrestar aquela mena d’escotada musicala perque poiriá expausar lèu totes los joves de la planeta a de grèus problèmas d’ausida. La resulta de l’estudi foguèt publicada dins lo numeric BMJ Global Health.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
