ES UTILIZADA LA BIO-IMPRESSION 3D PER CREAR DE TEISSUTS OCULARS
Es estada creada una nòva tecnologia que balha un nòu modèl per estudiar la genèsi de la degenerescéncia maculara ligada a l’edat e d’autras malautiás ocularas. Los scientifics usèron de cellulas maires de pacients e de bio-impression 3D per produire de teissuts oculars que permetràn de comprene melhor los mecanismes de cèrtas malautiás.
La còla de cercaires usèt una combinason de cellulas per formar la barrièra emato-retiniana extèrna – amb de teissut ocular que sosten de cellulas fotoreceptoras sensiblas a la lutz de la retina. La tecnica balha un aprovesiment illimitat de teissut derivat del pacient per estudiar de malautiás retinianas degenerativas dont la degenerescéncia maculara, ligada a l’edat.
Una malautiá pas gaire estudiada
“Sabèm qu’aquela malautiá comença dins la barrièra hémato-retiniana extèrna”, çò declarèt Kapil Bharti. “Pasmens, los mecanismes de començament e de progression de la malautiá cap als estadis secs e umids avançats demòran mal compréses encara a causa de la manca de modèls umans pertinents.”
La barrièra emato-retiniana extèrna es constituïda de l’epitèli pigmentari retinian desseparat per la membrana de Bruch del coriocapillar ric en sang. La membrana de Bruch regula l’escambi de nutriments. Amb lo temps una part se descompausa, entrainant una degenerescéncia de las cellulas fotoreceptoras e una pèrda de vision.
Mas los scientifics barrejèron tres tipes de cellulas coroidianas en un idrogèl; de pericites e de cellulas endotelialas ,compausantas dels capillars a mai de fibroblastes, qu’ajudan a estructurar plan los teissuts de l’uèlh. Puèi, amb aquel gèl podèron regenerar las cellulas tornarmai.
Pas gaire après los cercaires semenèron de cellulas epitelialas pigmentàrias retinianas. E lo teissut imprimit arribèt a la maduritat après 42 jorns. D’analisis posterioras confirmèron que lo teissut imprimit semblava plan la mateissa barrièra emato-retiniana extèrna nativa. Per ansin, los medicaments usats poguèron restaurar la morfologia dels teissuts malauts.
“En estampant de cellulas, facilitam l’escambi d’indicis cellulars necessaris en l’anatomia normala de la barrièra emato-retiniana extèrna”, çò diguèt Bharti. “La preséncia de cellulas produsís de cambiaments d’expression genica dins dels fibroblastes que contribuïsson a la formacion de la membrana de Bruch, quicòm suggerit mas pas encara provat fins al nòstre modèl.”
Los problèmas tanben foguèron màgers, cal caliá aver una regeneracion apropriada a mai d’una impression coerenta, e un idrogèl sensible a la temperatura. Los cercaires tanben optimizèron una mescla cellulara de pericites, de cellulas endotelialas e de fibroblastes. Lo cercaire Marc Ferrer apondèt que son de modèls de teissuts amb de nombrosas utilizacions potencialas e terapeuticas. Mas qu’encara cal desvolopar.
La Redaccion
