Uèi lo jorn lo sistèma de classament dels minerals es lo desvolopat pel geològ estatsunitenc James Dwight Dana en la decada de 1850. I son classadas mai de 5.400 espècias mineralas segon sa composicion quimia e estructuras cristallinas. Mas lo conegut scientific Robert Hazen prepausèt un nòu tipe de classament mineral segon lor evolucion. La proposicion es estada publicada al numeric American Mineralogist.
“Prepausi far un nòu classament mineral pr’amor que son estats descobèrts divèrses grops nòus de minerals que son pas dins lo sistèma tradicional, çò diguèt Robert Hazen, del Laboratòri Geofisic de l’Institut Carnegie. A mai, tanben i a, uèi, un grop de solids naturals non cristallins que tanpauc son estats compreses encara pr’amor que se pòt pas o far. Lo sistèma nòu de classament que prepausi es la resulta de l’evolucion naturala minerala a la planeta”.
Segon Hazen, un nòu sistèma qu’aguèsse coma basa l’evolucion minerala seriá plan mai eficaç e pr’aquò cal daissar endarrièr las teorias actualas (que balhan de nòvas e estonantas conclusions scientificas) e començar organizar e classar d’una autra manièra los minerals de la Tèrra.
Per ansin, Hazen, conegut dins la planeta tota per trabalhar dempuèi d’annadas amb l’evolucion dels minerals, confirmèt qu’un nòu sistèma poiriá inclure lo vejaire de l’ecologia minerala, çò es la diversitat dels minerals apuèi l’arribada de la vida a la planeta e una nòva e rica atmosfèra d’oxigèn. Segon aquela teoria, se pòt definir la distribucion espaciala minerala e quals airals pòdon encara aufrir de nòvas espècias encara per descobrir.
Un sistèma amb de nòvas categorias
Lo nòu tipe de classament prepausat per Hazen considèra, a mai del classament quimic mineral e la siá estructura cristallina, divèrses proceses biologics, quimics e fisics que pòdon arribar classar de diamants de l’espaci dels trapats a la planeta blava.
Totun, lo sistèma de classament mineral actual considera que de minerals amb una istòria evolutiva desparièra son, segon Hazen, dins lo quite grop. Aital, 32 espècias mineralas desparièras del mineral nomentat tormalina son dins lo meteis grop sens considerar la lor evolucion geologica. Amb un nòu sistèma de classament, çò diguèt Hazen, atanben poirián èsser classats de materials non cristallins coma lo veire volcanic, l’ambre o lo carbon, qu’uèi non son classats coma minerals. Per poder o far, segon Hazen, cal un nòu lengatge per descriure la creacion del mineral mas atanplan la siá istòria evolutiva.
La Redaccion
