ES ESTAT PRESENTAT LO TUNÈL DE TRANSPÒRT ULTRARAPID
Totes sabèm que la circulacion automobila dins las grandas vilas es un vertadièr problèma. Un problèma dels grands per çò que tòca a la pollucion mas tanben pels quites umans, que demòran arrestats sus las rotas pendent d’oras e d’oras. Es un problèma gigantàs que l’umanitat sap pas resòlver.
Benlèu es per aquò que l’òme d’afars Elon Musk decidiguèt de presentar publicament un nòu tunèl de transpòrt de nauta velocitat per de veituras que permetriá als usatgièrs d’aqueles veïculs de viatjar fins a 250 km/h e de traversar de grandas vilas coma Los Angeles en paucas minutas.
Lo nòu tunèl es un prototipe fach amb la darrièra tecnologia e realizat per l’entrepresa Boring (dirigida pel meteis Elon Musk) e que costariá solament 10 milions de dolars per cada tròç bastit. Al costat d’aquò, Elon Musk confirmèt que la tecnologia tradicionala per far un tròç de tunèl convencional costariá 1 miliard de dolars.
Segon Elon Musk, tanben proprietari de l’entrepresa que fa de veituras electricas Tesla Cars e de la companhia de vòls espacials SPACE X, seriá un tunèl qu’enviariá de veituras (electricas de segur) jos una granda vila coma Los Angeles a de velocitats de fins a 250 km/h. Aquò vòl dire en solament qualques minutas per traversar una vila aquela.
Un tunèl qu’es ja estat fach
Un tunèl com aquel e amb aquela tecnologia es ja estat fach. Lo bastiguèt la meteissa Boring Company d’Elon Musk en Califòrnia. Fa prèp de 2 quilomètres de longor, fonciona amb de veituras electricas Tesla e laissa aquelas veituras viatjar dins lo tunèl amb de velocitats realas que ja pòdon arribar prèp dels 100 km/h. Segon Musk, las veituras electricas an de besonh d’un complement dins las ròdas per poder intrar dins aquel biais de tunèl de nauta velocitat. Un complement que pòt arribar de costar fins a 300 dolars per veitura.
“Es un procès plan aisit, çò diguèt Tusk pendent la presentacion d’aquel tunèl. Son de tunèls qu’an l’escasença de transformar de veituras electricas normalas en de veituras passivas e que, amb l’ajuda d’un tipe de ròdas especial per estabilizar lo veïcul, pòdon far viatjar la veitura a nauta velocitat”.
Lo tunèl de nauta velocitat per de grandas vilas es una mena de tunèl que foguèt creada per Elon Tusk en 2018 pr’amor que podiá pas pus suportar la circulacion encombrada de Los Angeles e pr’amor que voliá ajudar a sos abitants a la fugir de manièra definitiva. Per ansin, bastiguèt al començament d’ongan un pichon tunèl coma aquel a Hawthorne, una comuna ont es situada la Boring Company e prèp de Los Angeles.
“Serà un tunèl ont se poirà viatjar amb la veitura amb de velocitats pròchas dels 250 km/h e que quand se’n voldrà sortir se o poirà far en tot montar per un tunèl lateral vèrs la superfícia de la vila, çò confirmèt Musk. Seriá coma un sistèma sosterranh d’autoestrada. E que fariá la distribucion de la circulacion automobila de Los Angeles d’un tunèl a un autre e amb l’avantatge de la nauta velocitat”. De tot en tot estonable.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
