ES DESCOBÈRT UN RINOCÈROS GIGANT FOSSIL EN CHINA
Una descobèrta fenomenala ven d’arribar de la man de la paleontologia chinesa. Foguèt descobèrt un fossil de rinocèros gigant, mai naut qu’una girafa. La tròba se debanèt al nòrd-oèst de China e l’ancian mamifèr foguèt un dels animals terrèstres mai grands que jamai visquèt a la planeta. Lo nom de la nòva espècia es Paraceratherium linxiaense e demorèt fa 2,5 milions d’annadas.
Lo mamifèr, a mai d’aquò, pesava mai de 21 tonas, çò que seriá lo pes de quatre elefants africans uèi lo jorn. Pasmens, e malgrat èsser classificat dins la familha dels rinocerosses, Peraceratherium, aviá pas de còrne mas son cap fasiá fins a 7 mètres de longor per arribar a la partida superiora dels arbres. La tròba es una mai de divèrsas que se debanèron ongan dins la província chinesa de Gansu e l’estudi foguèt publicat al numeric Communications Biology.
Los cercaires que confirmèron la descobèrta de Paraceratherium declarèron que trobèron lo fossil prèp del vilatge de Wangjiachuan en 2015 mas que foguèt pas fins ongan que l’espècia poguèt èsser classificada coma nòva. I trapèron una maissa e gaireben tot lo cran. Per ansin poguèron estimar qu’èra un rinocèros mas qu’aviá una sòrta de trompa, coma a lo tapir uèi.
Familha dels rinocèros
La còla de cercaires que confirmèt la nòva espècia de rinocèros gigant chinés foguèt dirigida per Deng Tao, de l’Institut de Paleontologia de Vertebrats e Paleoantropologia de Pequin. D’un autre costat, confirmèron que Paraceratherium foguèt familha d’autres espècias de rinocèros gigants que demorèron en Paquistan e aquò entraïnariá qu’auriá viatjat a travèrs de tota Asia centrala coma espècia.
Aquò confirmariá que se aquela espècia crosèt Asia centrala entre çò qu’uèi es Índia e Paquistan fins al nòrd-oèst chinés lo replanat de Tibet seriá alavetz fòrça mai plan qu’uèi lo jorn. “Las condicions tropicalas de l’airal ajudèron aquesta espècia a l’ora de tornar vèrs Asia centrala, çò que vòl dire, çò diguèt Deng, que la region de Tibet èra pas tan nauta coma uèi”.
La Redaccion
