I a fòrça momias de l’Egipte ancian trapadas pels cercaires que son pas jamai estadas analisadas fins a uèi lo jorn. De còps es pr’amor de l’estat delicat de la pròpria mòmia qu’arrèsta los scientifics de las analisar pr’amor que creson que poirián patir qualcun dan. Lo cas del faraon egipcian Amenhotep I, un dels pus celèbres de la longa lista de faraons de l’ancian Egipte èra pas estada analisada dempuèi la sieuna descobèrta. Ara, totun, en tot usar la tecnologia pus avançada, los cercaires analisèron cossí èra lo còrs del faraon sens dubrir la mòmia. E la resulta es estonanta.
Amenhotep I visquèt ara fa mai de 3 000 annadas. Foguèt lo segond faraon de la 18 dinastia e la sieuna momia demorava al Musèu de Lo Caire e èra pas estada dubèrta o analisada. Ongan una còla de cercaires assajèt de l’analisar sens trincar la corona de flors que i aviá al torn de la mòmia nimai la sieuna masca d’aur. Per l’analisar los cercaires utilizèron los escanèrs pus avançats. Lo faraon semblariá aver mòrt a l’edat de 35 annadas e faguèt 169 cm de nautor.
En mai d’aquò, tanben descobriguèron qu’aguèt bonas dents e que foguèt circumcidat. Al torn del faraon i avián 30 amulets e tanben una cinta amb de pèiras tanben d’aur. L’estudi foguèt realizat per una còla de cercaires egipcians dirigida per Sahar Saleem, de l’Universitat de Lo Caire.
Segon los cercaires, aquela cinta deuriá aver un usatge magic e los amulets, cadun, devián ajudar lo faraon mòrt dins lo mai enlà. “Avèm trapat una cinta d’aur amb Amenhotep I, çò diguèt Saleem. Los antics egipcians n’avián sovent. Qualcunas, coma aquesta, tanben avián d’amulets dins per protegir lo mòrt”. Amenhotep I tanben aviá lo cran escrancat, mas los cercaires podèron pas determinar la causa de la mòrt.
Un faraon important
Amenhotep I (1526 aC-1506 aC) foguèt pasmens un dels farons pus importants de l’Egipte antica. Pendent la 18 dinastia egipciana l’estat dels faraons s’espandiguèt plan vèrs lo nòrd de çò qu’uèi es Sodan e lo pròpri faraon ordonèt bastir plusors temples per soslinhar la sieuna òbra. Pasmens, los arqueològs an pas pogut encara certificar la causa de la mòrt del faraon malgrat que la sieuna mòmia foguèt trobada fa d’annadas. Lo luòc ont foguèt trobada la mòmia tanpauc es segur que siá ont foguèt sepelit originalament.
En 1882 l’arqueològ francés Gaston Maspero trapèt la mòmia d’Amenhotep al costat d’autras mòmias a l’oèst de Tebas. La mòmia foguèt situada ailà pendent la 21 dinastia (aperaquí 1070 aC- 945 aC) benlèu pr’amor que volián sauvar encara la mòmia dels raubaires de l’edat antica. Lo fach es que lo tombèu d’Amenhotep ja èra estat raubat mas sens destruire totalament la mòmia.
L’analisi actuala de la momia del faraon Amenhotep I confirmèt que la mòmia patiguèt cèrts dans quand lo tombèu foguèt sacat. “La momia aviá patit divèrses trincaments vertebrals e tanben la decapitacion. A mai de plusors còps a las gambas, çò confirmèt Saleem”. Totun, semblariá que divèrses prèires egipcians avián assajat d’adobar la mòmia puèi, amb de resina, e en tot momificar tornarmai lo faraon.
Pasmens, la causa de la mòrt foguèt pas trobada. “Òm pòt pas dire encara se la causa de la mòrt foguèt pr’amor de divèrsas nafraduras o benlèu pr’amor que patiguèt cèrta malautiá, çò apondèt Saleem. Mas çò que poguèt èsser confirmat es qu’Amenhotep foguèt plan semblant al sieu paire, Amòsis I. La mòmia d’Amenhotep I èra encara una de paucas momias de faraons egipcians antics qu’èran pas estadas encara analisadas e pr’açò los cercaires volguèron soslinhar que lo prètzfach èra important pr’amor qu’ajudava plan la sciéncia a descobrir cossí foguèt momificat e sepelit mas tanben cossí foguèt adobat sègles puèi pels prèires d’Amon. La cinta que trapèron sus la mòmia, totun, poiriá èsser estada daissada ailà per de prèires de la dinastia 21 e pas pels prèires originals. E pr’açò cal estudiar d’un biais mai prigond la momia. L’estudi foguèt publicat a Live Science.
La Redaccion
