Ei ua notícia susprenenta ath còp que fòrça bona: era populacion de rinoceròs en Africa deth Sud poirie tornar a créisher lèu pr’amor que i auec un declin ena massacres d’aguesti animaus pendent er an 2019. Atau ac anoncièc era organizacion WWF en Africa deth Sud que confirmèc qu’era caça illegau de rinoceròs queiguec er an passat e fòrça.
Segontes es naues donades confirmades peth Ministèri der Environament, Bòsqui e Pesca d’aqueth país era chifra de rinoceròs mòrti pes caçaires furtiui baishèc era anada passada de 769 animaus mòrti en 2018 enquia 594 en 2019. A mès d’aqueres bones donades, eth govèrn sud-african tanben confirmèc un declin fòrça important ena massacre d’elefants pr’amor qu’en 2018 sigueren caçadi de manèra illegau enquia 71 elefants en Africa deth Sud. Totun, en 2019 solament se passèc açò damb 31 elefants.
Entà WWF ei un hèt fòrça positiu veir qu’era luta contra era caça internacionau illegau d’animaus contunhe ben e qu’açò comence a èster un problèma entath sindicat criminau de païsi coma China, Malàisia, Singapor, Vietnam o Japon. Ei ua responsa complèxa des departaments policiaus, es parcs sud-africani, es trabalhadors environamentaus, es aduanes e eth govèrn deth país, a mès des organizacions qu’ajuden era fauna, coma WWF, e qu’en 2019 auec un resultat fòrça positiu.
Çò que se poirie passar en 2020
Es agents de WWF en Africa deth Sud, totun, non voleren hèr nat prediccion entà 2020 pr’amor dera situacion globau deth rinoceròs en Africa deth Sud. Atau, des dues espècies que i actuaument en aqueth país, ua des dues, era espècia deth Rinoceròs Blanc, non ei en declin, pr’amor qu’en 1970 i auien en aguest país solament 200 especimèns viui mentre qu’aué ja n’i a mès de 18.000. Maugrat açò, era auta espècia de rinoceròs que i a en Africa deth Sud, eth Rinoceròs Nere, òc que patís un declin grèu pr’amor qu’en 1970 i auien 16.000 especimèns e aué solament ne demoren 4.000, çò que situe aguesta espècia de rinoceròs en ua situacion prèpa ara extincion.
Atau, diuèrses hònts ecologistes j’avisen que s’açò contunhe atau, en 2025 non i aurien mès rinoceròs neres, au mens en Africa deth Sud e açò serie fòrça grèu pr’amor qu’eth 80% dera populacion mondiau de rinoceròs viu en Africa deth Sud. Maugrat tot açò WWF e eth govèrn sud-african voleren èster optimistes en çò que tanh ara luta contra era caça illegau deth rinoceròs en Africa deth Sud en 2020. I a mens caçaires illegaus qu’abans e poirie èster qu’es airaus on demoren seràn, en 2020, mès grani e tanben mès protegidi.
E tot açò en una luta fòrça perilhosa e malaisida, pr’amor qu’era còrna de rinoceròs ei aué pagada en mercat nere a mès de 65.000 $, çò ei mès cara encara qu’er aur o es diamants. “Es leis soletes non poden solucionar un problèma sociau e economic globau, qu’ei eth que i a ena luta contra era caça furtiua deth rinoceròs, çò diguec Jo Shaw, de WWF. Que cau cambiar actituds e manères de pensar ath còp que i a ua reduccion totau deth nombre de caçaires furtiu”.
Era Redaccion*
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
