L’entomologia es estonada pr’amor qu’es estada descobèrta en Índia una nòva espècia de formiga de color blava metallica. Los cercaires li an balhat lo nom scientific internacional de Paraparatrechina neela e la trapèron dins lo vilatge de Yingku, dins lo districte de Siang Èst, dins l’estat indian d’Arunachal Pradesh.
Conven de saber que Paraparatrechina es un genre de pichonas formigas que fan en mejana entre 1 e 2 mm, de la sosfamilha de las Formicinae. Demòran d’abitud dins de regions africanas tropicalas, d’Austràlia, en Imalaia, Oceania e plusors autras bioregions del Paleartic. Pòdon èsser trobadas dins la jungla tropicala mas tanben en selva dobèrta e tant per lo sòl coma dins los arbres. Uèi aquel genre conten 38 espècias desparièras e 4 sosespècias.
La sola formiga blava indiana
Malgrat que lo genre siá conegut dins tota la region de l’Imalaia, es lo primièr còp qu’es descobèrt sus lo continent indian. Divèrses especimens foguèron culhits dins un bòsc situat a 803 mètres d’altitud. “Quand exploràvem lo trauc d’un arbre qu’èra a 3 mètres, quicòm lusiguèt”, çò diguèt Dharma Rajan Priyadarsanan, de l’Institut Ashoka per la Recèrca en Ecologia e l’Environament.
“Amb l’aspirador aspirèrem dos insèctes e sonque puèi descobriguèrem qu’èran de formigas. La vertat es que la Val de Siang d’Aruchanal Pradesh es un paradís de la diversitat biologica e la cal explorar plan mai per saber çò qu’amaga”, çò apondèt lo cercaire.
Totun, aquela biodiversitat semblariá menaçada. I a projèctes de restancas, d’autoestradas e de bastiments militars que poirián provocar de damatges dins la val, aital coma ja ne causa lo cambiament climatic. E la menaça es pas sonque per la val mas mai enlà pr’amor qu’i vivon de milions d’umans.
Paraparatrechina neela es una formiga d’una longor mejana de 2 mm. Lo sieu cors es de color blava metallica, franc de las antenas e pautas. Lo còrs es subtriangular e a de grands uèlhs a mai d’una boca triangulara amb una maissa de cinc dents. La color es desparièra de la d’autras espècias semblablas de formigas trapadas de per abans. Car la color blava en un animal es un fenomèn plan rar.
Pasmens, tanben i a una sèria de vertebrats que son tanplan de color blava, dont de peissum, de granolhas, d’aucèls e encara d’aranhas. Malgrat aquò, es una color plan rara en las formigas.
Aquela color es producha per de pichonas estructuras fotonicas biologicas de l’animal, mai encara que per de pigmentacion, e a plan evolucionat segon los grops. Ara los cercaires se demandan s’aquela color es utilizada per comunicar, per s’amagar o encara per d’autras rasons. La descobèrta foguèt publicada dins lo numeric ZooKeys.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
