Aprèp lor aparicion a la preïstòria europea fa mai de 300.000 ans, los neandertalians arribèron a ocupar Euròpa tota e tanben un bon tròç de l’Orient Mejan: Fa ara 45.000 ans Homo sapiens neandertahlensis èra la primièra espècia umana en Euròpa.
Mas aprèp un creissement plan grand de la populacion, l’espècia desapareguèt d’un còp. L’analisi de divèrses lòcs arqueologics o confirma. Arribèron al pic de la sieuna populacion abans de declinar rapidament e s’atudar lèu.
L’estudi es estat realizat per una còla d’arqueològs qu’an coma cap Jürgen Richter, del Centre de Recèrca Collaborativa 806, un centre alemand. Dins l’estudi an ajudat tanben las universitats de Colònia, Bona e Aachen. La conclusion es que la populacion neandertaliana que demorava en Alemanha fa 45.000 ans cresquèt plan abans de declinar e desaparéisser lèu totalament.
Tot aquò se seriá debanat pendent lo Paleolitic – entre 200.000 e 40.000 annadas -. L’estudi es estat publicat per la revista Quaternary International Journal e la conclusion confirma que mai de 50% dels lòcs arqueologics ont demorèt neandertal son estats trobats a aquela epòca.
Una espècia amb una demografia flaca
Entre 60.000 e 43.000 ans la populacion neandertaliana arribèt al pic. Al delà, l’estudi analitic dels espleches e lòcs ont demorèt aquesta espècia confirman que los neandertalians patissián fòrça fluctuacions demograficas.
Aital, e pendent lo periòde preïstoric sonat Paleolitic Miei, neandertal auriá patit divèrsas migracions e après un creissement de la populacion abans de declinar demograficament e desaparéisser sens cap d’explicacion d’airals determinats alemands.
Entre 110.000 e 70.000 annadas s’es pogut confirmar l’existéncia de 4 lòcs ont visquèt neandertal. Mas entre 70.000 e 43.000 ans s’es trobat de rèstas neandertalianas en 94 lòcs. Aquò foguèt lo pic de la pòpulacion neandertaliana. Solament 1000 ans après aquesta data i aguèt una rapida declinacion demografica de neandertalians e pauc après desapareguèron totalament.
La causa d’aquesta desaparicion es pas estada trobada e i a sonca d’ipotesis : benlèu pr’amor que i aviá una plan baissa diversitat genetica o benlèu pr’amor qu’arribèt la nòstra espècia: Homo sapiens sapiens. La comunautat scientifica encara discutís sus aquò.
La Redaccion
