DE ROBÒTS AMICS
Plusors expèrts confirman que lo problèma de demorar solet quand un es vielh poiriá èsser finit amb los robòts de companhiá. Mai encara quand es plan conegut que la companhiá pòt entraïnar de problèmas de santat. Per poder o afirmar scientificament, una còla de cercaires faguèt un nòu estudi, car uèi la solitud es ja una vertadièra pandèmia mondiala, amb entre un 11% e un 26% de la populacion amb de problèmas pr’açò a l’ora d’ara.
La solitud entraïna de grèvas conseqüéncias per la santat, coma mai de pés, deméncia e tanben una lèu mòrt. Provòca de problèmas al sistèma immunitàri, aquel que lucha contra las malautiás e pòt menar a de situacions criticas.
La solitud es per totes parièr
Segon lo National Institutes of Health, la solitud es patida per totes e es pas importanta l’edat. D’efièch, als Estats units qui mai pateissen la solitud son los joves. Mas l’ajuda dels robòts de companhiá poiriá cambiar aquò. Divèrses cercaires universitàris d’Auckland, Duke e Cornell aital o prepausan. L’estudi foguèt publicat al numeric Science Robotics.
“Los robòts de companhiá an encara mai abilitats per començar de trobadas socialas, çò diguèt Elizabeth Broadbent, de l’Universitat d’Auckland. Totun cal totjorn complir la normativa que demòstra que son d’organimes morals e que podèm nos i fisar”.
Melhor es aver un amic uman mas pas totojorn òm ne pòt aver. “Tot soslinha qu’es çò de melhor que podèm far, çò diguèt Murali Doraiswamy, de l’Universitat de Duke. Aquò fins que la societat balharà prioritat a las relacions socialas e mai encara dels vielhs. Mas fins alavetz los robòts de companhiá pòdon venir una solucion per de milions d’umans isolats”.
Uèi lo jorn, i a de robòts socials coma ElliQ que pòt far companhiá als umans. E de mai en mai estudis suggerisson qu’aquel tipe de robòts pòdon redusir l’estranci e la solitud dels vielhs e demorar mai sanas.
I a tanben de robòts pus modèrns que pòdon crear de relacions socialas pus fòrtas encara amb los umans. Lo ChatGPT, pòt parlar e tanben remembrar de votzes d’umans que i son pas pus.
Segon una enquista de Sermo, lo 69% dels medecins estatsunitens èran d’acòrd amb los robòts de companhiá per melhorar la santat mentala dels umans. E un 70% demanava que las companhiás d’asseguranças devián pagar lo robòt trincat.
L’estudi demòstra que de robòts amistoses ajudan plan a redusir l’estranci e entraïnan una cèrt nivèl mai naut de santat. “Los robòts tanben pòdon ajudar a crear una societat pus sana, çò diguèron los cercaires”.
La Redaccion
