UN NÒU CONCÈPTE: LO TRANSUMANISME
Una nòva epòca entraïna totjorn de nòus concèptes. Un d’aqueles es lo transumanisme. Mas qu’es aquò ? Lo transumanisme es una amassada de tecnicas e de pensadas per melhorar l’abilitat umana a travèrs de ressorças mentalas o fisicas e amb l’ajuda de la nanotecnologia o la biotecnologia.
Un exemple ne pòt èsser tornar la vision a un cèc o tornar a far marchar a un òme paralisat amb de protèsis o un processador al cervèl, que pòt recebre d’estimulús per l’ajudar o encara luchar contra una malautiá coma lo Parkinson. E uèi lo jorn n’i a de mai en mai d’aquel tipe de processadors.
Un mond melhor
Los transumanistas radicals afirman qu’amb aquelas ajudas tecnologicas los òmes devon pas pus patir de malautiás, l’edat o encara la mòrt. E, per ansin, lo transumanisme pòt crear una nòva espècia de superumans.
Segon Raymond Kurzweil, director d’engenhariá de Google, lo cervèl uman serà conectat amb Internet abans de l’an 2030 per aver mai d’informacion sus tot. Aquò tanben es la pensada d’Elon Musk, fondator de Tesla, e d’Space X, qu’afirmèt fa temps que se òm pòt pas ganhar una maquina çò de melhor es ne venir una.
En 2013 Google creèt Calico per luchar contra l’edat e cèrtas malautiás. La tòca finala seriá arrivar a l’immortalitat. Val pas dire qu’aquò provoquèt una granda polemica. D’unes afirman qu’aquò es plan positiu. Per contra, d’autres confirman las valors moralas per sauvar la natura e tanben nòstra espècia.
La pensada del transumanisme vòl melhorar la condicion umana. E tanben provocar una evolucion pus rapida amb la sciéncia. E es afirmat que la mòrt, l’edat o las malautiás pòdon èsser superadas per la tecnologia actuala.
Lo transumanisme nasquèt a la decada de 1950 de la man de Julain Huxley, fraire de l’escrivan Aldous Huxley. Dempuei 1960 fins a 1990 foguèt parlat cossí melhorar l’espècia. Mas es dempuèi la decada de 1980 que lo movement comença a s’estructurar plan, mai que mai en Califòrnia. E arribèt fins a la literatura, lo cinèma o la benda dessinada.
Uèi Google investís plan en biotecnologia o intelligéncia artificiala. Mas tanben i a d’expèrts qu’afirman qu’aquò es un grand dangièr per l’espècia. I a paur a pérdre l’òrdre natural de las causas. Lo telefonèt entraïna mai de servituda que de libertat e de tecnologias ligadas al cors umans poirián provocar una pèrda de libertat encara màger.
La societat actuala es pas parièra pèr totes. Poiriá arribar que i a de personas que vòlon demorar pus abilas quora trabalhan e que cercaràn l’ajuda d’aquela tecnologia. Aquò provocariá encara mai diferéncias entre d’umans. Car totjorn son los pus rics aqueles que pòdon totjorn viure melhor.
Uèi i a fòrça cercaires contràris al transumanisme. Las conseqüéncias socialas serián plan complèxas e la polemica es pas encara barrada. Pasmens, los transumanistas prepausan un mond pròche amb d’umans que pòdon viure mai ans e melhor, la criogenia espaciala, una melhor memòria, l’escasença de telecargar al cervèl d’informacion, de cervèls sintetics e la fin de cèrtas malautiás actualas coma l’Alzheimer o lo Parkinson o encara de protèsis artificialas comunas e una modificacion volontària dels cors uman amb de tecnologia artificiala.
Uèi, urosament tot aquò es sonque fantasia. Cal esperar e veire se aqueles cambiaments tecnologics pòdon aquò crear o pas. Benlèu la morala umana resistirà plan e aquò arribarà pas jamai. E vosautres, quin es lo vòstre vejaire ?
La Redaccion
