DE PINTURAS NEANDERTALIANAS
Un còp cambiat lo vejaire sus l’espècia Homo neandertalensis, los scientifics cercan ara de caunas on trapar mai evidéncias de l’art neandertalian pr’amor quiòc, los neandertalians tanben pintèron de caunas e foguèron la primièra espècia ominida d’o far.
A la peninsula iberica semblariá èsser que la cauna ont i a las pinturas pus ancianas realizadas per de neandertalians es la cauna de Doña Trinidad, tanben coneguda amb lo nòm d’Ardales, de Malaga, al sud peninsular. La cauna foguèt pas descobèrta fins al sègle XIX quand, après un terratrèm, la sieuna dintrada demorèt tornarmai obèrta
L’estudi de las pinturas neandertalianas es estat fach per de cercaires de l’Universitat de Southampton, a mai de l’Institut Max Planck d’Antropologia Evolutiva alemand.
Pendent las annadas 2011 e 2018 los cercaires d’aquelas còlas analizèron las pinturas amb l’espèr de poder situar cronologicament las meteissas. Dins la cauna i aviá una sèria de ponchs, linhas e tacas que poirián representar una amassada pictorica plan estonanta.
La tecnica usada pels cercaires pr’amor del marrit estat de las pinturas foguèt lo de l’IUrani-Tòri. De remembrar qu’aquesta tecnica permet situar l’edat de pèiras de fins a 500.000 ans d‘edat amb sonque una plan pichona part del mur de pèira ont i avián las pinturas.
Una resulta plan estonanta
L’estudi d’aquelas pinturas de la cauna de Doña Trinidad confirmèt que l’edat de las meteissas èra plan anterior a l’epòca que nòstra espècia arribèt ailà, çò es fa mai de 40.000 ans, car avián una edat cèrta de 64.000 annadas. Sonque pr’açò los cercaires confirmèron qu’èran de pinturas neandertalianas.
De remembrar que lo sud peninsular iberic es una region ont es plan malaisit dire quora finiguèt l’espècia neandertaliana mas semblariá que i aguèt cèrta pression per part de nòstra espècia que, benlèu, auriá arribat a se mesclar amb los neandertalians.
Lo meteis estudi paleontologic tanben estudièt d’autras caunas, coma Ardales, La Pasiega a Cantàbria, o Maltravieso al sud-oèst peninsular. Las tres caunas balhèron de datas plan ancianas e aquò confirmèt que foguèron realizadas per de mans neandertalianas. Val pas dire qu’aquò tanben creèt una granda dicussion scientifica a nivèl mondial.
Segon lo director d’aquel estudi, Dirk Hoffmann, « la cultura materiala simbolica e la capitada culturala sonque èran estats restacats amb nòstra espècia fins a uèi lo jorn mas semblariá que tanben i aguèron d’autras espècias artisticas ».
D’un autre costat, lo celèbre cercaire de l’Universitat de Barcelona, João Zilhao, confirmèt que « Aicí avèm de creacions pas aleatòrias mas realizadas amb tota la volontat ».
Pels cercaires d’aquel estudi doncas, son de pinturas « situadas en de luòcs que semblan ésser restacats amb de formas naturalas de las caunas e serián de simbòls amb de significat en de luòcs, benlèu, divins ».
La Redaccion
