Fins ara se sospechava que cadun de nosautres aviá un “doble” sus la planeta. Aquò vòl dire una persona plan semblabla a nosautres. Mas se’n coneissiá pas la causa scientifica. Ara, un nòu estudi a demostrat que i a de milions de personas amb la cara semblabla e qu’aquò a per rason màger lo fach d’aver un ADN semblable.
L’estudi scientific, publicat al numeric Cell Reports, a confirmat la sospiècha. Es pas pus estonant de veire una persona que sembla fòrça una autra sus un autre continent; la causa n’es un còde genetic semblable. “Las personas de las caras semblablas an un genotipe comun e mai se pòdon aver de diferéncias a d’autres nivèls biologics”, çò diguèt Manel Esteller, de l’Institut de Recèrca de Leucemia a Barcelona, Catalonha.
Tot comencèt amb l’espandiment de la ret d’Internet. Alavetz fòrça personas comencèron de descobrir que i aviá tanben de personas practicament identicas a elas, almens en çò que pertòca la cara. E après aperaquí dos decennis de dobtes, la sciéncia a volgut demostrar s’aquò èra vertat o pas. La resulta del nòu estudi confirma una basa genetica comuna qu’entraïnariá lo fach d’aver una cara gaireben identica. Totun, aquò seriá la soleta caracteristica comuna entre aquelas personas, pr’amor que la majoritat an pas d’autres traches biologics comuns.
Per realizar aquel trabalh, los cercaires demandèron de personas semblablas a François Brunelle, un artista canadenc que ja aviá recebut de fòtos de personas amb de caras parièras dempuèi 1999. E poguèron aver fins a 32 personas amb una cara semblabla a la del canadenc. A mai d’aquò, los participants a l’estudi foguèron analisats biometricament e acceptèron que se faguèsse d’eles una analisi genetica. L’estudi, doncas, foguèt plan complet.
Un ADN comun
La resulta de l’estudi a confirmat que totas aquelas personas avián un ADN semblable mas que lor mapa biologica èra plan desparièra. Pasmens, las personas tanben avián de caracteristicas comunas coma lo pes, la nautor o la relacion amb lo tabac, a mai de l’educacion. E doncas l’estudi a tanplan demostrat que la genetica influís sus d’abituds de la vida vidanta.
“Avèm mandat un agach unic sus la cara umana, pr’amor que son de causas que determinan lo fisic a mai de las abituds de las personas, çò diguèt Esteller. E l’estudi balha ara una basa moleculara per d’estudis futurs que pòdon èsser realizats en biomedecina, dins lo camp de l’evolucion o encara de la criminalistica”.
“Desenant podèm saber que la fòto d’una persona pòt restacar aquela persona amb un tipe concret d’ADN”, çò apondèt Esteller. La tòca finala d’aquel tipe d’estudis serà de trapar una estructura umana e sa fisionomia sonque amb l’ajuda de la genetica. L’estudi tenguèt lo sosten de la Generalitat de Catalonha e del govèrn espanhòl, a mai de la Fondacion Cellex.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
