La sciéncia ven de descobrir un nòu metòde per salvar los rinocèros africans que patisson un òrre chaple dels braconaires. La bana del rinocèros es d’efièch totjorn raubada pels braconaires tanlèu aucit l’animal. Segon la medecina tradicionala chinesa, la bana auriá de proprietats terapeuticas. E pr’amor d’aquò aqueles mamifèrs son tuats e caçats.
Fa gaire, Science Alert confirmèt la descobèrta d’un nòu metòde per salvar los rinocèros d’aquela trista fin. E ja son faches de provaments en plusors rinocèros d’Africa del Sud. L’entrepresa The Rhino Orphanage foguèt la primièra a o far.
Qual es aquel metòde ? Cal metre de radiotòps dins las banas del rinocèros. Lo metòde es pas brica car e pòt durar fins a cinc annadas. Es, en mai d’aquò, una nòva estrategia per localizar los braconaires s’aucisson un rinocèros, e los poder arrestar sul pic.
Un nòu metòde estonant
Foguèt après l’alèrta lançada per Science Alert que tota la planeta poguèt saber que los primièrs rinocèros de The Rhino Orphanage avián recebut los primièrs isòtops radioactius; aquel tropèl de rinocèros es situat dins las montanhas del Waterberg d’aquel país. Lo metòde es inclús dins lo projècte Risotòp.
James Larkin, professor de l’Universitat de Witwatersrand, foguèt lo primièr a balhar l’informacion: s’òm met de radioisòtops dins la bana del rinocèros, aquesta demòra radioactiva e pòt pas èsser manjada per d’umans (çò que fan los chineses). Aital se poiriá salvar l’espècia.
Cal saber tanben que los isotòps radioactius que demoraràn dins la bana dels rinocèros son plan flacs e son pas un dangièr per la santat dels animals. Mas pro fòrts per empachar lo consum de la bana après la mòrt de la bèstia. Lo fach tanben foguèt confirmat pel cercaire Nithaya Chetty, de la meteissa universitat.
De remembrar que, fa gaire, lo WWF confirmèt que los sols predators que los patisson uèi lo jorn los rinocèros son los braconaires. “Dempuèi 2008, mai de 10 000 rinocèros foguèron caçats per de braconaires sonque en Africa del Sud, çò ditz un estudi recent. Aquò es la tresena forma de crime organizat al Mond”.
Un autra chifra ajuda a comprene aquel trist fenomèn. Segon James Larkin, “un rinocèros d’Africa del Sud morís cada 20 oras pr’amor de las siás banas”. Aital, sonque en 2023 foguèron tuats 499 rinocèros en aquel país, un 11% mai qu’en 2022.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia Principala: Bernard Dupont
