Un nòu estudi confirmèt cossí l’elevatge dels cans cambièt d’un biais radical la siá forma e mentalitat. Lo trabalh scientific confirmèt la creissença de la capacitat comunicativa mas tanben cooperativa dels cans pendent lor elevatge pels umans. A mai, l’evolucion de l’espècia provoquèt una atraccion màger per l’òme.
Segon Hannah Salomons, que dirigiguèt l’estudi fach per l’Universitat de Duke, los cans an una abilitat pròpria per comprene la nòstra comunicacion e que volèm los ajudar; per poder confirmar d’un biais scientific tot aquò, los cercaires estudièron 44 cadèls de can e 37 lobatons, amb una edat d’entre 5 e 18 setmanas, amb la tòca d’espepissar la siá conducha per rapòrt als umans.
Un còp, amaguèron de noiridura, e senhalèron als cadèls ont èra amagada. La majoritat dels canhòts trapèron la noiridura pr’amor que comprenián çò que volián dire los umans. Los pus joves tanben. Per contra, los lobatons demorèron fòrça mai temps per comprene çò que volián dire los umans. 17 dels 31 cadèls de can i arribèron. Cap dels 26 lobatons capitèt d’o far.
“Parlam pas d’intelligéncia d’espècias, çò diguèt Salomons. La siá capacitat cognitiva es parièra e tanben la siá memòria. Los canhòts an una capacitat per comprene çò que vòlon dire los umans que los lops an pas. I a d’estudis que demòstran que los canhòts s’aprochan fins a 30 còps abans als umans que los lops”.
D’animals aimants dels umans
A mai d’aquò, quand d’umans dintravan dins la barradura dels canhòts totes volián jogar amb l’uman, del còp que los lobatons fugissián per s’amagar. Quand la noiridura èra amagada e barrada, los lops assajavan d’i arrivar per eles meteisses e los cadèls cercavan d’ajuda entre los umans. Espepissavan los umans als uèlhs en tot demanar “se eles podián aquò resòlvre”. Es una capacitat sociala pròpria de l’espècia qu’arribèt sonque amb l’elevatge uman.
“Los cans son vertadièrament premanits per ajudar los umans, çò declarèt Brian Hare, autor de l’estudi. Quand d’umans indican una direccion los cadèls o comprenon plan e los lobatons pas. E aquò sonque se debana quand l’animal espera d’ajuda de l’uman”. L’estudi foguèt publicat al numeric Current Biology.
La Redaccion
