Es benlèu un dels paradises de la planeta e lo sieu nom es Bora Bora. Es sonque un atòl de las Illas de la Societat, situadas a l’ocean Pacific, e forma part de la nomenada Polinesia Francesa, al nòrd-oèst de Tahiti, aperaquí a 260 quilomètres al nòrd-oèst de Papeete.
Al torn de Bora Bora i a divèrsas illas pichonèlas amb pas gaire vegetacion. Un dels luòcs pus visitats – e aimats pels toristas de tota Polinesia- es Motu Tapu. En mai d’aquò, dempuèi Bora Bora òm pòt espepissar plan las illas pròchas de Tahaa, Raiatea e Maupiti. Lo clima de l’atòl es tropical marin e aquò vòl dire que i a fòrça pluèja pendent l’estiu pr’amor del monzon – mai que mai pendent novembre e abril segon l’estiu austral-. E, per ansin, la temperatura de Bora Bora es cauda pendent tot l’an.
Un atòl plan pichon
Bora Bora s’espandís sonque al long de 29,3 Km2 e es format per un volcan escandit desseparat de la mar per un escuèlh. Benlèu pr’aquò es considerat un dels luòcs pus toristics de tota la planeta. La siá fònt principala d’argent es, val pas o dire, lo torisme. Lo Mont Otemanu seriá lo luòc pus naut de l’atòl de Bora Bora.
Es pas res mai que l’ancian volcan escandit, qu’arriba a 727 mètres de nautor sus lo nivèl de la mar. L’umitat del luòc provoca un sòm amb de nívols totjorn al sieu torn pr’amor del vent. Tupitipiti Point es a la part pus meridionala de la barrièra de coralh que i a al torn de Bora Bora e tanben es considerat coma un endrech plan polit e que cal visitar totjorn.
La sotada per poder veire d’espongas amb divèrsas colors o lo peissum estonant que i a ailà es un dels espòrts mai recomandats. Aital, òm pòt agachar de làmias, de raias e encara de peisses-perroquet en d’airals coma Matira Point o los jardins de coralh que i a en Motu Toopua. La plaja de Muri (Muri Beach) es, sens dobte, la melhor plaja de tot l’atòl. Òm ne pòt parlar coma una suma estonanta de sabla blanca, de palmièrs e d’aiga clara de color turquesa de pas gaire prigondor.
Se çò de normal es trapar pas un ostal a la plaja, per contra, a Bora Bora es plan aisit. Òm pòt causir de resòrts de naut nivèl o encara de luòcs pus economics. Pasmens, aquò provoca un sens fin de toristas. Malgrat tot aquò, a Punta Matira òm pòt gausir plan d’aquela plaja. Lo soleh es tras qu’estonant, sustot al ser, e la siá lutz e colors provòcan un oratge emocional plan intens. Bora Bora es doncas un luòc que cal visitar se òm aima plan la natura.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
