Après èsser arribada a Jupitèr aquest meteis mes, la sonda espaciala JUNO, lançada per la NASA, ja a començat de mandar d’imatges dei lunas d’aquesta planeta, d’Io, de Ganimèdes, d’Euròpa e de Callisto. Pasmens, aquestei son gaire bònas – son de bassa resolucion – e d’imatges melhors arribaràn sus Tèrra dins plusors setmanas. E lo temps que n’an de besonh per traversar lei mai de 580 milions de quilomètres que i a entre las doas planetas.
La NASA a ben recebut aquesteis imatges e ja a demandat d’ajuda a totei leis estudiants de la planeta per lei poder mielhs estudiar. Es un afar qu’auriá d’implicar tota l’umanitat, çò dison leis astrofisicians estatsunitencs. Leis imatges son una pròva de mai que l’intrada dins l’atmosfèra de Jupitèr de la sonda JUNO s’es ben passada e qu’aquesta s’es gres degradada.
“Nos triga de recebre lei premiers imatges dei pòls de Jupitèr – çò diguèt Scott Bolton, de l’Institut de Recèrca dau Sud-Oèst Estatsunidenc-. E quand aquesteis imatges poguèsson aver una melhora resolucion visuala, son lei melhors imatges que l’umanitat a jamai agut dei lunas d’aquesta planeta”.
JunoCam, una camèra especiala
Leis imatges que son arribadas sus Tèrra son estadas fachas per JunoCam, una camèra especialament concebuda per prene d’imatges dei pòls de Jupitèr. Pasmens, la tòca es pas vertadierament aquesta mai d’assajar de reünir tota l’umanitat dins l’estudi deis imatges qu’arriban e arribaràn sus Tèrra. Es una camèra publica e la NASA vòu que la comunautat educativa ajude a leis estudiar.
Lei scientifics qu’an recebut aquesteis imatges an confirmat que lei premiers imatges amb auta resolucion seràn realizadas lo 27 d’aost per amòr que JUNO tornarà dins l’atmosfèra d’aquesta planeta. Pasmens, es solament lo premier còp qu’aquesta sonda fa lo torn de Jupitèr, puei qu’encara aurà de l’encerclar fins a 37 còps de mai – çò es près de 4 100 quilomètres –.
Un dei autrei trabalhs qu’aurà de far JUNO serà d’estudiar lei nívols escurs que i a l’entorn de Jupitèr ansin coma leis auròras que se produson sus aquesta planeta. Aquò ajudarà a mielhs comprene leis originas de Jupitèr e pereu seis atmosfèra e magnetosfèra.
La Redaccion
